13-февралда Казакстандын Орусиядагы элчилиги 1994-жылы туулган казак жараны Виктор Филинков 25-январда кармалганын, учурда Петербургдагы №3 тергөө абагында камакта экенин билдирди.
«Башкы консулдук Виктор Филинковдун мыйзамдуу укуктарын коргоо жана консулдук-укуктук жардам берүү үчүн аны менен жолугушуу уюштуруу өтүнүчү менен Орусия ТИМинин Петербургдагы өкүлчүлүгүнө кайрылган. Азырынча орус бийлигинен жооп келе элек. Бул багытта иштер уланууда», — деп жазылган басма сөз кызматтын билдирүүсүндө.
Буга чейин маалымат каражаттары Флинковдун жубайына таянуу менен ал 23-январда Киевге учуу үчүн «Пулково» аэропортуна баратканда жоголуп кеткенин жазышкан.
Филинков түрмөгө барган Коомдук байкоочу комиссиянын мүчөлөрүнө аэропортто кармалгандан кийин кыйноого алынганын айткан. Комиссиянын документтерине ылайык, Филинковдун денесинде электрошокерден калган күйүктүн издери табылган. Айыпталуучунун айтымында, аны ФСБнын кызматкерлери жана беткапчан адамдар токойго алып барышып, тагылган айыптарды моюнга алышын талап кылып кыйнашкан.
25-январда Санкт-Петербург соту Филинковду 23-мартка чейин камакта калтыруу чечимин чыгарган. Тергөөнүн версиясы боюнча, ал белгисиз адамдар менен бирге «террордук ишмердүүлүк жана пропаганда менен алектенүүнү, ошондой эле терроризди актоо жана колдоону» максат кылган топ түзүшкөн.