Мамлекет башчынын 2017-жылдагы макалалары, интервьюлары жана жыйындарда айткан сөздөрүнөн турган жыйнак түркмөн, англис жана орус тилдеринде чыгып келет.
«Китепте эл аралык принциптердин алкагында өлкөдө жүргүзүлүп жаткан конституциялык жана укуктук реформаларга чоң көңүл бурулган. Мындан тышкары 2017-жылдагы маанилүү окуялардын бири болгон президенттик шайлоо тууралуу айтылган. Анда Гурбангулы Бердымухамедов ишенимдүү жеңишке жетип, үчүнчү жолу өлкө башчы болуп шайланган. Бул түркмөн эли мамлекет башчы алып бараткан саясий багытты колдоп жатканын ачык көрсөтүүдө», — деп жазды мамлекеттик ТДХ агенттиги.
Президент Гурбангулы Бердымухамедов 2006-жылы бийликке келгенден бери ондогон китептердин автору болгон. 11 жыл ичинде өлкөдө анын түркмөн тилиндеги жана чет өлкөлөргө которулган 50гө жакын эмгеги басылып чыккан. Былтыр эле Бердымухамедовдун авторлугунда түрдүү багыттагы бир нече китеп жарык көргөн.
