Унда таъкидланишича, Кенгаш бўлажак мажлисга материаллар тайёрлашга киришиб кетди, мажлисда «мурожаат белгиланган тартибда кўриб чиқилади».
Президент Нурсултон Назарбоев ўз мурожаатида Конституциянинг 42-моддаси 3-бандининг нормаси юзасидан изоҳ берилишини сўрайди. «Республика президентининг ваколатлари республиканинг янги сайланган президенти лавозимига киришганидан сўнг, шунингдек муддатдан аввал озод қилинганида ёки вафот этганида тўхтатилади. Республиканинг барча собиқ президентлари, мансабидан четлаштирилганларидан ташқари, Қозоғистон республикаси экс-президенти унвонига эга бўлади», - дейилади мазкур пунктда.
Нурсултон Назарбоев салкам 30 йилдан бери Қозоғистоннинг биринчи раҳбари бўлиб келмоқда. У ҳокимиятга СССР тарқалиб кетишидан аввал келган. У 2015 йил апрелда бўлиб ўтган сайловларда, расмий маълумотларга қараганда, 97 фоиздан кўпроқ овоз олган ва беш йиллик муддатга қайта сайланди.
2018 йилнинг декабр ойи сўнггида Назарбоев қозоғистонлик журналистларга берган интервьюсида мамлакатда муддатдан аввал сайловларга тайёргарлик олиб борилмаётганини айтган эди. Бундан аввалроқ у, сайловлар бўлиб ўтадиган 2020 йилгача анча вақт борлигини ва ўзи сайловларда иштирок этиш ёки этмаслик борасидаги режасини кейинроқ маълум қилишини таъкидлаган эди. Конституцияга кўра, навбатдаги президентлик сайловлари декабр ойининг биринчи якшанбасида ўтказилади.
Конституцион Кенгаш мурожаат келиб тушганидан кейин бир ойлик муддатга ўз қарорини эълон қилади. Агар масалани кейинга қолдирмаслик зарурати пайдо бўлгудек бўлса Президент талаби билан бу муддат ўн кунгача қисқартирилиши мумкин.