Молиявий органнинг мурожаати давлат нашрларида чоп этилган. Унда айтилишича, истаган киши ўзининг таклифларини тузатиш устида иш олиб бораётган ишчи гуруҳга ёзма шаклда ёки электрон почта орқали жўнатиши мумкин.
Ҳаддан ташқари катта солиқлар ва солиқ ундиришнинг мураккаб тизими борасида кўп миқдорда шикоятлар келиб тушганидан кейин расмийлар Солиқ кодексини қайта кўриб чиқишга қарор қилди. Мамлакат президенти Эмомали Раҳмоннинг топшириғига кўра, 20 июндан бошлаб бош вазирнинг биринчи ўринбосари Давлатали Саид бошчилигидаги махсус ишчи гуруҳи тузатишлар устида ишлашга киришди, бугунги кунгача гуруҳнинг учта мажлиси ҳам бўлиб ўтди.
Тлжикистон Молия вазирлигининг солиқ сиёсати ва давлат йиғимлари Бош бошқармаси раҳбари Шодиён Завқибекнинг 19 июль куни Озоди радиоси билан суҳбатида айтишича, ишчи гуруҳ мажлисларда бошқа мамлакатларнинг солиқ қонунчилигини ўрганишга катта эътибор қаратмоқда. «25 июлгача биз бошқа мамлакатларнинг тажрибасини ўрганишимиз ва навбатдаги мажлисда муваффақиятли тажриба юзасидан якуний хулосага келишимиз ва келгусидаги ишларимизнинг шаклини белгилаб олишимиз керак», - дейди суҳбатдош.
Шодиённинг сўзларига кўра, Солиқ кодексига тузатишларни ишлаб чиқишда эътибор солиқ ставкаларини пасайтиришга, солиқ ундириш тизимини соддлаштиришга, солиқ тўловларининг электрон тизимини жорий этишга, солиқ инспекторларини қисқартиришга қаратилади. «Бизнинг мақсад – техника ва технологияларнинг домий тараққиётини ҳисобга олувчи ва халқаро стандартларга жавоб берувчи, сармояларни жалб этишга, қулай сармоявий муҳитни ва тадбиркорликни ривожлантиришга имкон бериши мақсадида янгиланган солиқ кодекси орқали мавжуд камчилик ва муаммоларни бартараф этиш», - дея қайд этди у.
Расмий органлар солиқ тизими таҳрир қилингандан ва солиқ тизими соддалаштирилгандан сўнг, солиқ тўлашдан бош тортиш фактлари камайишига, солиқ тўловчилар сафи тўлиб боришига ишонади. Тожикистонда солиқ ундириш тизими бир неча марта тадбиркорлар томонидан танқидга учраган.
“Милал Интер” тадбиркорлар ва тоғли фермерлар Ассоциацияси раиси Боймамамад Алибахшов солиқ ставкаларининг пасайтирилиши ва тадбиркорлар учун солиқ имтиёзлари тақдим этиш тарафдори эканини айтади.
"Paying Taxes 2019" тадқиқоти натижаларига қараганда, Тожикистонда умумий солиқ ставкаси 67,3%ни ташкил этади, бу эса Марказий Осиё ва Шарқий Европадаги мамлакатлар билан солиштирганда икки марта кўп демакдир.