Департамент маълумотига кўра, мухбирларга уюштирилган ҳужум ва инсон ҳуқуқлари бўйича Қозоғистон бюроси режалаштирган матбуот анжумани барбод қилинганидан кейин беш киши – конференция ташкилотчилари ва журналистлар полицияга арз қилишган. Шу билан бирга полицияга уч кишининг мурожаати ҳам тушган бўлиб, улар “тадбир ташкилотчилари ва журналистлар томонидан тан жароҳатлари етказилгани тўғрисида” шикоят қилишган. «Мазкур факт бўйича суд-тиббий экспертиза ўтказилади», — деб хабар беради полиция департаменти матбуот хизмати.
Азаттикнинг тасвирга олиш гуруҳи — мухбир Нургул Тапаева ва видеооператор Токмолда Кусаинов — 22 июль куни Алматида ҳужумга учради. Беш нафар номаълум аёл операторга ҳужум қилишган, видеокамерани шикастлаб, мухбирни калтаклашган.
Инсон ҳуқуқлари бўйича бюро ходими Сергей Дувановнинг сўзларига кўра, “кескин кайфиятдаги аёллар” гуруҳи – ҳаммаси бўлиб 20 киши – “Давлат оналар ва болларга қарши курашмоқда” деб номланган матбуот анжуманига 20 дақиқа қолганида идорага кириб келган. Унинг иштирокчилари 4 июль куни бошқа аёллар билан биргаликда тергов турмасига жойлаштирилган, Алматида қамоққа олинган кўп болали она Оксана Шевчук иши тафсилотларини гапириб беришмоқчи бўлишган. Полиция май ойидаги рухсат этилмаган аксилҳукумат норозилик чиқишлари ва уни ўтказишга уриниш вақтида икки марта қўлга олинган Шевчук ва ёлғиз оналар Гулзипа Жаукерова ва Жазира Демеуоваларни мамлакатда таъқиқланган “Қозоғистон Демкратик танлови” (ҚДТ 2009 йилдан бери хорижда яшаётган Қозоғистон ҳокимиятининг танқидчиси Мухтор Аблязов томонидан ташкил этилган) ҳаракатининг фаолиятига алоқадорликда гумонламоқда.
Номаълум аёллар журналистларга тасвирга олишга имкон беришмаган, айримларнинг смартфонларини тортиб олишган, ёзиб олувчи техникаларни шикастлашган. Жабрланганлар орасида КазТАГ агентлиги ва “Алмати” муниципиал телеканали вакиллари бор.
Полиция воқеа жойига қўнғироқдан кейин ярим соат ўтиб келган. Журналистларнинг айтишича, бу вақтга келиб ҳужумчилар бинодан чиқиб бўлган, полициячилар фақат бир аёлни ушлашган.
Охирги вақтларда Азаттик журналистлари расмийлар томонидан кучайтирилган эътибор ва таъкиблар остида профессионал фаолиятида тўсиққа учрамоқда.
Мазкур ҳужум шу ой бошидан бери иккинчиси бўлди — 6 июль куни номаълум киши Пойтахт куни норозилик билдиришга уринганларнинг қўлга олинишини ёритаётган Азаттик журналистлари томонга аччиқ газ сепган.