Аксилкоррупция ташкилоти директори Сулаймон Султонзода 30 июль куни Душанбеда журналистларнинг саволларига жавоб бера туриб, уларнинг идорасига Ражабзода иши бўйича “шикоят ва танбеҳлар” келиб тушмаганини, шунинг учун унга нисбатан ҳеч қандай текширув ўтказилмаганини баён қилди. Агентлик раҳбарининг жавоби журналистларда кўплаб саволларнинг туғилишига сабаб бўлди. Жумладан, журналистлар атиги бир йилу саккиз ой ишлаган амалдор қандай қилиб, коррупцияга аралашмай учта квартира ва машиналарнинг эгасига айланган, деган саволларни ўртага ташлашди.
Бироқ Сулаймон Султонзода бу борада мунозарани давом эттиришни хохламади. Шу йилнинг 10 майида молиявий, солиқ ва божхона соҳаси вакиллари иштирокидаги кенгайтирилган мажлисда президентнинг муваффақиятли кареьера қила олган ёш божхоначи билан қилган кескин суҳбати кўпроқ сўроқни эслатарди. Президент Шахбоз Ражабзодани ўрнидан турғазиб, ундан неча уй ва машинаси борлигини сўради. Давлат раҳбари йиғилганларга Ражабзода фанларни ўзлаштиролмагани учун университетдан ҳайдалганини хабар қилди. Эмомали Раҳмон божхоначини кўп ҳолларда “мамлакат раҳбарининг фарзандлари номидан гапиришда” айблади.
«Сенинг гуноҳинг бошингдаги сочингдан кўп. Қаерда ишламагин, сени ҳамма ердан ҳайдашган. Сени ишга қандай қабул қилишди, ақл бовар қилмайди», - ҳайратланди президент. «У ҳеч кимга бўйсунмайди, ҳатто саломлашмайди. Нима, сен осмондан тушганмисан? Нима, гуноҳсизмисан? Камчиликларинг йўқми?». Аён бўлишича, Ражабзода ҳарбий карьера қилишга ҳам улгурган, лейтенантдан подполковниккача кўтарилган ва 16 марта хорижда ҳам бўлган.
Бироқ бундай шармандали ва қаттиқ ҳақоратдан сўнг президентнинг божхоначини “кечириши” ва унинг ёшлигини инобатга олиб, фақат ариза ёзиб, лавозимни тарк этиш топшириғини бергани кўпларни ажаблантирди..
Танқидчилар фикрича, бошқа ҳар кимдан кўра Шахбоз Ражабзоданинг иши тергов органларини қизиқтириши керак эди, бироқ, собиқ ёш амалдорнинг ҳокимиятга яқинлиги ва таниқли шифокорнинг ўғли эканлиги сабаб уни кечиришди ва қўйиб юборишди. Бошқа кузатувчилар бу ишни коррупцияга қарши кураш эмас, фақат “кўргазмали сўкиш” деб баҳоладилар.
«Президент бу билан давлат молиясига алоқадор амалдорларни сурбет бўлиб кетмаслиги ва хушёр бўлиши учун силкитиб қўймоқчи бўлган, акс ҳолда уларни Ражабзода тақдири кутади», деб ҳисоблайди Озодлик радиоси суҳбатдошлари.