Ссылки доступа

Тожикистонда корхона Шинг дарёсига келиб тушаётган оҳак чиқиндилари учун жаримага тортилди


Тожикистон атроф-муҳитни муҳофаза қилиш қўмитасининг маълум қилишича, Панжикентнинг Шинг дарёси қирғоғидаги “Зарафшон” олтин қазиш корхонаси яқинида зарарли чиқиндилар иборат ахлатхонани топган.

Идоранинг Сўғд вилояти бўйича раиси ўринбосари Бунёд Абдумаликзоданинг 30 июль куни журналистларга хабар қилишича, дарё қирғоғидан 50 метр узоқликда қўмита мутахассислари “Зарафшон” олтин қазиш корхонасига тегишли бўлган оҳак чиқиндиларидан иборат ахлатхонани аниқлашган. Абдумаликзода ахлатхона чиқиндилари атроф-муҳитга зиён етказаётганини хабар қилди. Амалдорга кўра, аниқланган қонунбузарлик ва корхона томонидан етказилган экологик зарар муносабати билан ишлаб чиқарувчи жаримага тортилган.

«Зарар суммаси тахминан 200 минг сомоний (тахминан 20 минг АҚШ доллари) ни ташкил қилади, жарима суммаси эса 11 минг сомоний (1200 АҚШ доллари атрофида) ҳажмида белгиланган”. Бунёд Абдумаликзодага кўра, Шинг дарёси қирғоқларида ахлат ҳажми 3330 кубни ташкил этган, шунинг асосида протокол тузилган. Абдумаликзода фикрича, ёзнинг иссиқ иқлими, шунингдек, ёмғир ва селлар оҳак чиқиндиларининг бир қисмини дарёга оқишига сабаб бўлди.

Абдумаликзода корхона чиқиндилари оқибатида балиқлар ўлими фактини тасдиқламади. Шу йилнинг июль ойи ўрталарида Панжикент дарёси қирғоқларида топилган, сув юзига чиқиб қолган катта миқдордаги балиқ таналари мумкин бўлган экологик муаммодан ташвишланган маҳаллий аҳолининг норозилигига сабаб бўлди. Аҳоли корхонадан узоқ бўлмаган сувда ҳалок бўлган юзлаб балиқлар акс этган фотосурат ва видеокадрларни интернетда эълон қилди.

Абдумаликзоданинг сешанба куни журналистларга айтишича, учта экспертиза натижалари ўлик балиқ организмида заҳарли ашёлар мавжудлигини тасдиқламаган. У фақат шу йилнинг 14 июлида кўл қирғоғини бузган сел оқимлари балиқлар ўлимига олиб келган бўлиши мумкинлигини тахмин қилди. «Катта сув оқими кўл дамбасини бузиб юборди, сув оқиб кетди, балиқ эса сувсиз қолди, лой аталасида ҳалок бўлди».

Бироқ маҳаллий яшовчилар балиқлар ўлимига айнан оҳак корхонасининг чиқиндилари сабаб бўлганига ишонишади. Дарвоқе, дарё қирғоғида корхонанинг дарёдан сув ичиш тавсия этилмаслиги борасидаги огоҳлантирув ёзувларини кўриш мумкин.

Эколог Ҳасан Асоев тожик расмийлари ҳар қандай саноат жараёнларининг экологик оқибатларини ҳисобга олишга ва фақат шундан кейин иқтисодий шартномаларни имзолашга мажбурлигига ишонади. «Ишнинг фақат иқтисодий фойдалари ҳақида ўйлашдан олдин корхона ишининг экологик оқибатларини ўрганиш зарур», деб ҳисоблайди эколог.

XS
SM
MD
LG