Сокинони шаҳри Марии Туркманистон хабар доданд, мақомоти он шаҳр аз касоне, ки барои дарёфти ариза ё ҳуҷҷате муроҷиат мекунанд, расидҳои пардохти хизматрасониҳои комуналӣ талаб менамоянд.
"Субҳ (8 август) мо назди бинои Сабти асноди ҳолатҳои шаҳрвандӣ (ЗАГС) истода будем. Ин муассиса дар робита ба ақди никоҳ, бекор кардани он, таваллуд ва марг санад медиҳад. Касоне ки дар навбат буданд, ба муассиса даромада, зуд берун мешуданд. Як корманди он берун омада, гуфт, беҳуда дар навбат наистед, зеро бе нишон додани расиди пардохти ҳаққи истифодаи обу барқ ба касе санад дода намешавад", - гуфт як сокини маҳаллӣ.
Мақомоти Туркманистон ба ин тартиб, талош доранд, ки сокинон ҳаққи истифодаи обу барқу газро пардохт намоянд. Дар минтақаҳои дигари Туркманистон пештар аз ин аз кормандони бахши буҷавӣ талаб карданд, ки барои дарёфти маош нахуст расиди пардохти ҳаққи истифодаи хизматрасониҳои комуналиро пешниҳод кунанд.