– Агар тинч акциялар қонун бузилишлари ва фуқаролар хотиржамлигига ҳалақит бермайдиган бўлса, у ҳолда ён босиш керак ва қонунда белгиланганидек намойиш ўтказишга рухсат бериш лозим, бунинг учун махсус жой ажратилиши керак. Бу жой шаҳар четида бўлиши керак эмас, - деди президент парламентда Қозоғистон халқига қилган мурожаатида.
Шу билан бирга у “Конституцияга зид ҳар қандай ҳаракатлар, безорилик акциялари қонун доирасида таъқиб қилинишини” таъкидлаб ўтди.
Қозоғистонда тинч намойиш ўтказиш учун фуқароларнинг маҳаллий ижроия органларидан рухсат олиши кўрсатилган қонун амал қилади. Қоидага кўра, маҳаллий ижроия идоралари митинг ўтказиш жойи сифатида турар-жой мавзеларини ёки шаҳар чекасини таклиф қилишади. Хуқуқ ҳимоячилари ва халқаро ташкилотлар Қозоғистон қонунини халқаро стандартларга мос келмаслигини айтиб танқид қилишади, уларнинг фикрича, тинч намойишларни ташкиллаштириш огоҳлантирувчи характер касб этиши керак.
Рухсат берилмаган митинглар иштирокчилари полицияга олиб бориладилар, жаримага тортиладилар ва ҳибсга олинадилар. Фаолларнинг сўзларига қараганда, кўп ҳолларда ҳукумат танқид қилинадиган тадбир учун рухсат олишнинг имкони бўлмайди. Ҳукумат ўзлари рухсат берган тинч намойишларнигина қонуний дея тан олади.
Бир неча минг кишилик норозилик намойишлари фонида 9 июнь куни бўлиб ўтган сайловларда ғалаба қозониб мансабига киришган Қозоғистон президенти Қасим-Жомарт Тоқаев ғарб журналистларига берган интервьюсида митинглар тўғрисида қонун лойиҳаси ишлаб чиқиш режаси борлигини айтган эди. Танқидчиларнинг таъкидлашларича, Тоқаев томонидан ваъда қилинган “янгиликлар” амалдаги қонунчиликда мавжуд.
Сўнгги бир ярим ойда бўлиб ўтган кичик акциялар ва ўнлаб пикетларда иштирокчилар қўлга олинмади. Аввалги шу каби тадбирлар вақтида кўплаб одамлар эҳтимолий норозиликлар тўғрисида пост қолдиргани учун ҳам маъмурий жавобгарликка тортилган эди. Айрим танқидчилар бу Тоқаевнинг мурожаатномага ва ўзининг ташаббуси билан таъсис этилган, президентнинг сўзларига қараганда фуқоролик жамияти билан мулоқот ўрнатиш мақсадида ташкил этилган, Жамоатчилик ишончи Миллий кенгаши мажлисига тайёргарлиги билан боғлиқ қисқа муддатли тренд бўлишини тахмин қилишган эди.