Бу ҳақда Азаттық радиосига «Атажұрт еріктілері»нинг янги раҳбари Ербол Даулетбекули маълум қилди.
Бундан аввал шу йилда «Атажұрт еріктілері» бир неча бор рўйхатдан ўтишга ҳаракат қилган, аммо натижа бўлмаган эди: департамент ўз жавобида қонунчилликда кўзда тутилган ҳужжатлар йўқлигини айтарди. Бирлашма иштирокчилари рўйхатдан ўтказилмаслик сиёсий сабабларга эга эканлигини айтиб келарди. Шу ойда «Атажұрт еріктілері» иштирокчилари баёнот бериб, департаментни судга берганликларини маълум қилдилар.
— 12 сентябрь куни бўлиб ўтган матбуот анжуманида биз департаментни судга берганимизни маълум қилдик. 14 сентябрь куни бизларни департаментга таклиф қилишди. У ерда бизга Низомнинг айрим бандларига ўзгартиш киритиш лозимлигини айтишди. Департаментда айтишдики: «Низомга ўзгартиш киритиб олиб келинг рўйхатга оламиз». Биз жавоб бердик: «Яхши, агар рўйхатга олсангиз биз судга берилган аризани қайтариб оламиз». Мана қўлимизда рўйхатга олинганимиз тўғрисида гувоҳнома бор, — дейди бирлпшма раҳбари.
«Атажұрт еріктілері»нинг даъво аризаси бўйича суд эшитувлари 25 сентябрга белгиланган эди. Ербол Даулетбекулининг айтишича, судга борган ва суд мажлисида даъвони қайтариб олган.
Олмаота Адлия департаментининг юридик шахсларни рўйхатга олиш бўлими бошлиғи Акерке Кожахметова 24 сентябрь куни «Атажұрт еріктілері» ташкилоти рўйхатга олингани борасидаги хабарни тасдиқлади. Унинг айтишича, «ташкилот ҳужжатларида йўл қўйилган мавжуд хатоларни тузатди».
«Атажұрт еріктілері» 2017 йилдан бери фаолият юритиб келади, у биринчилардан бўлиб Шинжонда қозоқлар, уйғурлар ва этник камчиликларга нисбатан босим бўлаётгани ҳақидаги муаммони кўтариб чиққан эди.
Март ойида ушланган ва беш ойдан бери пойтахтда уй қамоғида бўлиб турган ташкилотнинг аввалги етакчиси Серикжан Билаш “нифоқ қўзғатиш” иши бўйича айбига иқрор бўлишга қаратилган процессуал Битимни имзолади. Билаш 280 доллардан кўпроқ жаримага тортилди ва унга етти йил муддатга жамоат ташкилотларига раҳбарлик қилиши тақиқланди.
Хитойнинг Шинжонида этник камчиликнинг таъқиб қилинаётгани ва улар “сиёсий қайта тарбиялаш лагерлари”га мажбуран жойлаштирилаётгани ҳақидаги илк хабарлар 2017 йилда пайдо бўлган эди. Турли сабаблар билан Хитойга чиқиб кетган қозоқлар Қозоғистонга қайта олмадилар. Улардан айримлари “лагерлар”га мажбуран жойлаштирилганликларидан шикоят қилишди. Ўтган йили БМТ баёнот бериб, Шинжонда бир миллионга яқин этник уйғурлар ва туркий тилда гаплашувчи бошқа миллат вакиллари “экстремизга қарши кураш марказлари”да мажбуран ушлаб турилганини, яна бир миллионга яқин киши “сиёсий қайта тарбиялаш лагерлари”га жўнатилганини маълум қилди.