Ауэзов туман №2 судининг судьяси Андрей Штейнке 2019 йил февралида коррупцияга қарши кураш идораларининг амалиёти давомида қўлга олинган эди. Тергов версиясига кўра, 2018 йил сўнгида судья лавозимида ишлаб турган Штейнке гўёки кўчмас мулкни бузишга йўл қўймасоликка ёрдам бериш эвазига танишидан пора олган. Андрей Штейнке судда ўзига қўйилган айбни инкор қилди.
23 июль куни Алмали туман суди 40-ёшли Андрей Штейнкени «жиноят аломатлари йўқлиги боис» оқлади. Туман суди баёнотига кўра, судьяга пул бериш факти аниқланмади.
Жамоатчилик вакиллари судьяга нисбатан чиқарилган оқлов ҳукмидан эътироз билдиришди. Чунки у «пора олаётганда қўлга олинган эди». Кейинроқ шаҳар суди, “процессуал бўлмаган алоқага киришгани учун” Штейнке мансабидан четлаштирилганини маълум қилди.
Бугун аксилкоррупция хизматининг баёнотига қараганда, Олмаота шаҳар жиноят ишлари бўйича апелляция ҳайъати Ауэзов туман № 2 судининг судьяси Андрей Штейнкени айбдор деб топган ва уч ярим йил муддатга қамоққа ҳукм қилган. У давлат хизматларида ишлаш ҳуқуқидан маҳрум қилинди.