Компаниядан хабар беришларича, олдин президент Сооронбай Жээнбеков ва бош вазир Муҳаммадкалий Абилгазиевга масалани тинч ҳал қилиш тўғрисида мактуб жўнатишган, аммо жавоб олишмаган.
«Компания ҳали ёздаёқ ҳукуматга хат жўнатди. Жавоб олмади. Ҳозир иккинчи хат жўнатилди. Компания музокараларга тайёрлигини ва компанияни қониқтирадиган қарор қабул қилинса муаммони судсиз ҳам ечишга, арбитражга мурожаат этмасликка тайёрлигини хабар қилмоқда», - дейди компания адвокати Бактибек Жумашев.
Компания халқаро арбитраж судига мурожаат қилиш нияти ҳақида 2019 йилнинг май ойида маълум қилган. Компаниянинг ҳукуматдан бой берилган фойда учун 50 млн евро ва нуфузига етказилган зиён учун товон пули сифатида 50 млн евро талаб қилиши хабар қилинган.
Қирғизистонда 2019 йилдан бошлаб электрон умумфуқаровий паспортлар берилиши бошланиши керак эди. 2018 йилда Давлат рўйҳатлаш хизмати (ДРХ) янги намунадаги паспорт электрон бланкаларини сотиб олиш учун тендер эълон қилган. Унда бешта хорижий компаниялар иштирок этди, литванинг «Гарсу Пасаулис» компанияси ғолиб деб тан олинди. Бироқ немисларнинг Muhlbauer ID Services ва французларнинг IDEMIA France компаниялари тендер чоғида қоидабузарликка йўл қўйилганини айтиб, танлов натижалари бекор қилинишини талаб этишди.
Февралда қоидабузарлик далиллари бўйича жиноий иш қўзғатилганди. Давлат рўйҳатлаш хизмати вакилларини минимал суммани ҳам таклиф этолмаган компанияни ғолиб деб топишгани учун коррупцияда гумонлашмоқда. Тергов маълумотига кўра, танлов иштирокчилари таклиф этган суммалардаги тафовут 253 миллион 377 минг 750 минг сомни ташкил этган. «Инфоком» давлат корхонаси директори Талант Абдуллаев, статс-котиб Данияр Бакчиев ва ДРХ раисининг ўринбосари Русланбек Сарибаев қўлга олинди. Абдуллаев ва Сарибаев кейинчалик уй қамоғига ўтказилди. ДРХнинг собиқ раиси Алина Шаикова қидирувга берилди.
2019 йилнинг майида Бишкекнинг туманлараро суди «Гарсу Пасаулис» компанияси ғолиб деб эътироф этилган, янги намунадаги умумфуқаровий паспорт учун бланкалар тайёрлаш тендери натижаларини бекор қилди.
7 октябрда YouTube да Абдуллаевнинг янги намунадаги паспортлар учун бланкалар тендерини ўтказишда ДРХ собиқ раиси Алина Шаикова Литванинг «Гарсу Пасаулис» компанияси манфаатларини устун кўришини тан олувчи видеоси пайдо бўлди. Видеода Абдуллаев унинг ўзи компанияга мойиллиги учун 20 минг доллар олганини айтади.
Миллий хавфсизлик Давлат қўмитасида видеога ҳеч қандай алоқалари йўқлигини айтишди. Литва компаниясининг адвокати видео ташламасини МХДҚ ва манфаатдор шахслар судга босим кўрсатиш учун уюштирганини айтди.