Ссылки доступа

Казакстанда жаңы партия түзүү ниетин билдирген активист тоскоолдуктарга кабылууда


Жакында эле жаңы саясий партия түзүү ниетин билдирген казакстандык активист Жанболат Мамай бийлик анын аймактарга чыгып, тилектештери менен жолугуусуна тоскоолдук кылып жатканын билдирди.

2017-жылы шарттуу түрдө үч жылга эркинен ажыратылган Мамайдын айтымында, 1-ноябрда Пробация кызматы анын Алматы шаарынан чыгуусуна тыюу салды.

— 2-ноябрдан 8-ноябрга чейин Казакстандын батышындагы аймактарды кыдырууну пландагам. Бирок 1-ноябрда Алматынын Карасай райондук пробация кызматы «мага карата көзөмөл чарасы күчөтүлгөнүн жана шаардан чыгуума тыюу салынганын» билдирди, — деди Мамай.

Активисттин айтымында, ал өткөн айда жаңы партия түзүү ниетин билдиргенден кийин пробация кызматы аны мурдагыдай айына бир жолу эмес, беш жолу каттоодон өтүп турууга милдеттендирген. Ал бул чечимди өзүнүн жарандык активдүүлүгү менен байланыштырууда.

Өз кезегинде Адвокат Жанара Балгабаева «Саясий калем. Трибуна» гезитинин мурдагы редактору Жанболат Мамайдын өлкөнүн аймактарына баруусунда эч кандай маселе болбошу керек деп эсептейт.

— Сот Мамайдын журналисттик ишмердүүлүк менен алектенүүсүнө тыюу салган. Ошол эле маалда анын коомдук иштер менен алектенүүсүнө эч кандай чектөө жок. Эгер ал башка аймактарга барса, бул тууралуу пробация кызматына кабарлап, пландары тууралуу айтышы керек. Мындан тышкары барган жериндеги пробация кызматына каттоого турушу зарыл, — деди адвокат.

Ал пробациялык көзөмөлдөгү адам мыйзам бузушу мүмкүн деген кооптонуулар болгон учурда анын каттоодон өтүү мөөнөтү көбөйтүлүшү мүмкүндүгүн билдирди. Адвокат Мамайдын айына беш жолу каттоодон өтүп турууга милдеттендирилиши анын коомдук-саясий активдүүлүгү менен байланыштуу болушу мүмкүндүгүн кошумчалады.

31 жаштагы Жанболат Мамай 2017-жылы сентябрда үч жылга шарттуу кесилип, бул аралыкта журналисттик ишмердүүлүк менен алектенүүсүнө тыюу салынган. Ал акыркы он жылдан бери чет өлкөдө жашап жүргөн мурдагы банкир Мухтар Аблязовдун БТА Банктан чыгарып кеткен каражатын адалдаштырган деп айыпталган. Мамай бул дооматтарды четке каккан.

Видео

XS
SM
MD
LG