Бириккен Улуттар Уюму (БУУ) бүгүн АКШдан Климат боюнча Париж келишиминен чыгуу боюнча атайын билдирүү алды. Бул тууралуу «РИА Новости» кабарлады.
Климат боюнча Париж келишимине 197 өлкө кол койгон. Документтин максаты – 2100-жылга чейин планетадагы орточо температураны индустриалдык доорго чейинки орто көрсөткүч деңгээлинен 2 Цельсий градустан ашырбоо. Келишим 2016-жылы 4-ноябрда күчүнө кирген. Келишимдин шарты боюнча бир дагы өлкө алгачкы үч жылда андан чыга албайт.
Климат боюнча келишимден чыгуу Трамптын шайлоо алдындагы берген убадаларынын бири. Ал келишим АКШ үчүн экономикалык жактан пайдасыз экенин, жумуш орундары кыскарып, айлык акы төмөндөй турганын билдирген. Анын айтымында, АКШ Париж келишиминин шарттарын аткарса, 2025-жылга карата үч миллион жумуш орунунан айрылышы мүмкүн.
Трамптын сынчылары эгер Вашингтон Париж келишиминен чыкса, глобалдык жылуулукка каршы күрөшүүгө чоң сокку урулат деп эсептешет.
АКШ уулуу газдарды абага чыгаруу боюнча Кытайдан кийин эле экинчи орунда турат.
Келишимге кол койгон ошол кездеги президент Барак Обама 2025-жылга чейин зыянкеч газдын абага бөлүнүп чыгарылышын 26-28 пайызга кыскартуу милдетин алган.