АҚШ Геологик хизмати магнитудаси 6,4 балл бўлган зилзила эпицентри пойтахт Тиранадан 30 км масофада, 20 км чуқурликда бўлганини маълум қилди.
Кучли зилзила ортидан бир неча кичикроқ титраш содир бўлган. Уларнинг иккитаси магнитудаси 5,1 ҳамда 5,4 баллни ташкил қилган.
Президент Илир Мета журналистларга қилган мурожаатида аҳвол жиддий эканлигини, вайроналар остидан одамларни қутқариш учун барча чоралар кўрилаётганини айтди.
Бош вазир Эди Рама қўшни мамлакатлар, Европа Иттифоқи ва АҚШ ёрдам таклиф қилганини маълум қилди. Рама Косово, Италия, Греция ҳамда Туркия етакчилари билан ҳамда Тиранадаги АҚШ ва Европа Иттифоқи элчихоналари билан суҳбатлашганини қўшимча қилди.
Соғлиқни сақлаш вазири Огерта Манастирлиу 300 га яқин жароҳат олган шахс Дуррес ҳамда Тирана шаҳарларида даволанаётганини маълум қилди.