«Журналистлар бу фактлар ҳақида гапиришганида мен унчалик эътибор қаратмадим. Аммо сўнгги материалда қасам ичган зобитлар бу ҳақда гапиришди. Қандай мамлакатда яшаяпмиз? Зобитлар ҳарбий прокуратура фактлар бўйича жиноий иш очгани боис олти ойдан бери қочқинда эканликларирни айтишмоқда. Агар ҳарбий прокуратура шу ишга борган экан, погонли кишилар улардан қочишга мажбур экан, у ҳолда кимга ишонишимиз керак? Парламентнинг тегишли қўмитасига вазифа юкланг. Биз бу фактларни кўриб чиқишимиз керак. Бу оддий масала эмас, бу мамлакат хавфсизлигидир. Президент ва ҳукумат бунга муносабат билдириши керак», -деди депутат.
«Азаттық» радиоси(RFE/RL), OCCRP ва «Клооп» журналистларининг «Яширин курьерлар. Қирғизистондан миллионлабдоллар нақд пуллар қандай қилиб олиб чиқилмоқда» журналистик суриштирувида «Манас» аэропортининг хавфсизлик хизмати собиқ ходими ва «Манас» аэропортида ишлаган Чегара хизматининг собиқ ходими интервью берган. Суриштирувда йиллар давомида Қирғизистондан миллионлаб доллар пуллар ноқонуний олиб чиқилгани, яширин пуллар эса коррупцияни кучайтириши, давлат хазинасига зарар етказиши ва ҳатто одамларнинг ўлидирилишига сабаб бўлиши таъкидланади.
Бу суриштирувнинг учинчи қисми. Биринчиси 2019 йил майида эълон қилинди. Суриштирувда таъкидланишича, келиб чиқиши уйғур бўлган хитойлик тадбиркор Айеркен Саймаити иштирокида шубҳали йўллар билан Қирғизистондан умумий қиймати 700 миллион доллар олиб чиқиб кетилган.
Мазкур суриштирувнинг иккинчи қисми шу йилнинг 21 ноябрь куни эълон қилинди, унда бу маълумотларни журналистларга Айеркен Саймаитининг ўзи бергани таъкидланади. Унинг айтишича, бу маблағларнинг олиб чиқиб кетилишига Давлат Божхона хизмати раисининг собиқ ўринбосари Райимбек Матраимов ҳам алоқадордир.