Тўрт йил муқаддам мазкур компанияга катта майдон 49 йиллик муддатга ижарага берилган эди. 2015 йилда Тожикистон парламенти бу ҳужжатни маъқуллаган эди. Унга кўра қўшма корхона мамалакатнинг йирик қишлоқ хўжалик минтақаси бўлмиш Хатлон вилоятининг бир нечта туманида пахта етиштириш билан шуғулланиши керак эди.
Ўшанда расмийлар, мазкур компанияга ер ажратилишидан кўзланган асосий мақсад қишлоқ хўжалик маҳсулотларини ишлаб чиқарилишини ошириш, ташлаб қўйилган ерлардан унумли фойдаланиш ва шу тариқа минтақа иқтисодиётини юксалтиришдан иборат экани ҳақида баёнот берган эди. Бугун маълум бўлишича, Қўшма корхона дастури режа бўйича амалга ошмай қолди, шу йилнинг 11 декабрь куни «Джунтай-Хатлон-Син Силу» вакили парламентнинг қуйи палатаси мажлисида компания ернинг маълум қисмини унинг эгаларига – туманларга қайтаришини маълум қилди.
«Джунтай-Хатлон-Син Силу» йирик тожик-хитой қўшма корхоналаридан бири сифатида Данғарада катта тўқимачилик фабрикасибунёд қилган бўлиб, бу ерда бир йилда 25 минг тоннагача пахта толаси қайта ишланиши мумкин. Бу объект Хитойнинг Тожикстондаги йирик иқтисодий лойиҳаси ҳисобланади.
«Джунтай-Хатлон-Син Силу» вакили парламент мажлисида ернинг қайси қисмидан воз кечилгани борасида маълумот бермади, аммо ўзлари томонидан пахта етиштириладиган майдонларда бу йил мўл ҳосил йиғиб олинганини эслатиб ўтди. Парламент қуйи палатасининг спикери Шукуржон Зухуров: «Мақсадингиз қандай? Бизнинг ўзимиз тажрибани қўллаб ишлаган ҳолда пахта етиштирамизми, ёки ерларимизни хорижликларга бераверамизми?» дея сўради. Бунга жавобан қўшма корхона вакили: «бугунги кунда бизда молиявий ресурслар йўқлиги боис ишни давом эттиришимиз учун ўрганишимиз ва фойда олишимиз керак» деди.
«Джунтай-Хатлон-Син Силу» - Тожикистонда ер участкаларини ижарага олган Хитойнинг ягона компанияси эмас. ТР Қишлоқ хўжалик вазирлиги маълумотга кўра, «Синзян инхай» ва «Хай Ли» компаниялари ҳам Тожикистон жанубида 300 гектардан ортиқ ерни 49 йил муддатга ижарага олган ва у ерда қишлоқ хўжалик маҳсулотлари етиштириш билан шуғулланмоқда.
Айрим экспертларнинг таъкидлашларича, молиявий етишмовчилик, юқори сифатли уруғлар ва янги технологияларнинг йўқлиги тожик қишлоқ хўжалик ходимларининг хитойлик фермерлар билан рақобатлашишидаги муаммолардан биридир.