Ссылки доступа

Украина менен орусиячыл жикчилдер туткундарды алмашты


Туткундарды алмашуу. 29-декабрь 2019-жыл

29-декабрда Украинанын бийлиги менен өлкө чыгышындагы орусиячыл жикчилдердин ортосунда туткундарды алмашуу жараяны аяктады.

Жекшемби күнү кечинде Киевге өткөрүлүп берилген адамдар бар учак Борисполь аэропортуна конуп, аларды Украинанын президенти Владимир Зеленский тосуп алды.

Күндүз украин президентинин кеңсеси жикчилдердин туткунунан бошотулган адамдардын сүрөттөрүн жарыялаган. Анда Киевге 76 адам берилгени жазылган. Украинанын Коопсуздук кеңеши алардын аты-жөнүн жарыялады. Ага ылайык, бошотулгандардын 12си аскер кызматкери, калганы жарандык адамдар. Өлкөнүн Улуттук коопсуздук жана коргонуу кеңешинин катчысынын кеңешчиси Сергей Сивохо Украина жикчилдерге 127 адамды өткөрүп бергенин билдирди. Өз кезегинде жикчилдер алардын аты-жөнүн жарыялаган жок, бирок бошотулгандардын 80% Киевдин көзөмөлүндө болбогон аймактардын тургундары экенин билдирди.

«Азаттык» радиосунун украин кызматы жикчилдердин көзөмөлүндөгү аймактардын жашоосу тууралуу жазып келген журналисти Станислав Асеев туткундан бошотулганын билдирди. Ал 2017-жылы жайында Донецкте кармалып, тыңчылык айыбы менен 15 жылга эркинен ажыратылган. Буга чейин бир катар эл аралык уюмдар Асеевди бошотууну талап кылышкан.

Киевге бир нече украинчил активисттер дагы берилди. Алардын арасында донецктик блогер Олег Галазюк, 2018-жылы дайынсыз жоголуп кеткен Первомайск шаарынын тургуну Олена Сорокина жана Украинанын Коопсуздук кызматы менен иштешкен деп айыпталган Лугансктын жашоочусу Виктория Воронина да бар.

29-декабрдагы туткундарды алмашууну дүйнөнүн бир канча өлкөсү, анын ичинде Германия, Литва, Орусия, Словакия, АКШ жана Франция кубаттады.

«Эркин Европа/Азаттык» радиосунун президенти Жейми Флай кабарчылардын бошотулганын кубаттап, «Стас менен Олегдин эркиндикке чыгышына кубанып турабыз» деп билдирди.

26-ноярбда Флай украин президенти Владимир Зеленский менен жолугушканда эки журналистти туткундарды алмашуу тизмесине кошууну өтүнгөн. «Алар кылмыш кылганы үчүн эмес, өз мекениндеги орусиялык оккупация тууралуу чындыкты айтып турганы үчүн эки жарым жыл сырткы дүйнөдөн обочо кармалып турушту», - деп белгилеген Флай.

«Донбасс Реалии» сайты өлкөнүн Коопсуздук кызматына шилтеме кылуу менен жикчилдердин көзөмөлүндөгү аймактарда 250 украиналык туткун калганын жазды. Алардын арасында жарандык адамдар менен катар эле аскер кызматкерлери да бар.

Видео

XS
SM
MD
LG