Дар ин бора мақомоти Қазоқистон ба расонаҳо хабар доданд. Ба гуфтаи мақомот, дар марзи Қазоқистон бо Ӯзбекистон наздики 3 ҳазор муҳоҷир аз ҳисоби шаҳрвандони Тоҷикистону Ӯзбекистон ҷамъ шуда буд. Ин муҳоҷирон ба далели паҳншавии вируси корона ва баста будани марзҳо натавонистанд, бидуни монеа ба манзилҳои худ расанд. Ӯзбекистон, ки аз охири моҳи март марзҳояшро баста аст, ба далели надоштани ҷой барои ба карантин гирифтани афроди аз хориҷ баргашта, ба муҳоҷирон иҷозаи убури марзро намедиҳад.
Мақомоти Қазоқистон гуфтанд, шоми 8 июл дар марзи ин кишвар бо Ӯзбекистон наздики 3 ҳазору 400 муҳоҷир ҷамъ шуда буд. Шаби 9 июл наздики 2 ҳазор муҳоҷир аз марз гузашта, вориди Ӯзбекистон шуданд. Ба ҷуз ин, 500 муҳоҷири дигар иҷозаи убур дарёфт кардаанд. Сафорати Ӯзбекистон дар Қазоқистон ваъда кардааст, ки ба ҳамаи дармондагон иҷозаи убур хоҳад дод.
Дар ҳамин ҳол, сафорати Тоҷикистон дар Қазоқистон хабар додааст, ки наздики 50 шаҳрванди Тоҷикистон дар марзи Қазоқистон бо Ӯзбекистон боқӣ мондааст.