Маалыматка караганда, адатта 33 миң рубль алган короо шыпыруучуларга бул жолу 23 миң гана рубль берилди. Негизинен мигранттардан турган жумушчулар бул акча менен Москвада жашоого дээрлик мүмкүн эмес экенин билдиришүүдө.
Москвада короо шыпыруучу жумушуна мигранттарды «Жилищник» деп аталган мамлекеттик ишкана жалдайт. Мекеме айлыктары эмне себептен кыскартылганын билүү үчүн барган жумушчуларга Москванын Түндүк округунун префектурасы акча которбогондугун билдирди. Өз кезегинде префектура өкүлдөрү айлык акы маселесин компаниянын директору чечерин айтып, мигранттарга 15 мүнөттүн ичинде тарап кетишпесе, полиция чакыра тургандыктарын эскертишти.
«Короо шыпыруучу мигранттар аба ырайына жана коронавирус пандемиясына карабастан, жылына 365 күн дем алышсыз иштейбиз. Акыркы айларда негизги жумушубузга аймакты дезинфекциялоо ишин да кошуп коюшту. Ошондуктан кошумча акы төлөөнүн ордуна айлыкты азайтууну адилетсиздик деп эсептейбиз», — деди Рустам аттуу мигрант.
«Жилищник» ишканасынын өкүлдөрү бул тууралуу комментарий берүүдөн баш тартышты.
Ушу тапта Левобережный районундагы коммуналдык кызматтын жумушчулары массалык түрдө иштен кетүү тууралуу арыз жазууга даярданып жатышат. Мындан тышкары алар укук коргоочулардын жардамы менен Орусиянын Тергөө комитетине арыз менен кайрылууну көздөшүүдө.
