Ссылки доступа

Мухолифон Саакашвилиро дар интихоботи нахуствазири Гурҷистон номзад карданд


Михаил Саакашвили 

Ҳаракати муттаҳидаи миллӣ ва чанд ҳизби дигари мухолифи сиёсӣ дар Гурҷистон Михаил Саакашвилиро ба интихоботи моҳи октябри имсол ҳамчун номзад ба мақоми нахуствазирӣ пешбарӣ кардаанд.

Раиси ин ҳаракат Григол Вашадзе рӯзи 7-уми сентябр гуфт, ки Саакашвилӣ “бояд ба Гурҷистон баргашта дар назди мардумаш бошад”.

Саакашвилӣ рӯзи 6-уми сентябр дар Фейсбук навишт, ки нақша дорад ба Гурҷистон баргардад. Саакашвилии 52-сола солҳои 2004 то 2013 дар мақоми раёсатҷумҳурии Гурҷистон кор кардааст.

Ҳаракати муттаҳидаи миллӣ соли 2012 дар интихоботи парлумонии Гурҷистон аз ҷониби эътилофи “Орзуи Гурҷистон”-и миллиардер Бидзина Иванишвилӣ, нафаре, ки баъдан мунаққиди президент шуд, мағлуб гардид. Саакашвилӣ баъди хатми мӯҳлати раёсатҷумҳуриаш дар охири соли 2013 аз кишвар берун рафту бархе аъзои ҳизбаш боздошт шуданд.
Январи соли 2018 додгоҳе дар Гурҷистон Саакашивилиро дар ғайбаш барои, ба гуфтааш, пинҳон кардани шаҳодати куштори як бонкдор гунаҳгор ва ӯро ба се соли зиндон маҳкум кард. Июни соли 2018 додгоҳи дигаре Саакашвилиро дар сӯиистифода аз қудрат гунаҳгор ва дар ғайбаш ба шаш соли зиндон маҳкум кард. Худи Саакашвилӣ ин иттиҳомотро рад карда гуфт, ки ҳама иттиҳомот дорои ангезаҳои сиёсӣ ҳастанд. Вазири адлияи Гурҷистон Теа Тсулукианӣ гуфт, ки агар Саакашвилӣ баргардад, ҳамон замон боздошт ва ба зиндон андохта мешавад. Саакашвилӣ солҳои 2015-16 ба ҳайси раиси вилояти Одессаи Украина кор карда, баъди истеъфояш президент Петро Порошенкоро дар фасод муттаҳам кард. Порошенко дар ҷавоб ӯро аз шаҳрвандии Украина маҳрум кард.

Соли гузашта, вақте президент Владимир Зеленский сари кор омад, ӯ шаҳрвандии украинии Саакашвилиро барқарор ва бозгашти ӯро ба кишвар таъмин кард.

Моҳи май Зеленский Саакашвилиро ба мақоми раиси кумитаи иҷроияи Шӯрои миллии ислоҳот дар Украина таъйин кард. Интихоботи парлумонии Гурҷистон 31-уми октябр баргузор мешавад.

XS
SM
MD
LG