Ба иттилои ин расонаҳо, Навалний ҳамаи ҷузъиёт, ба иловаи аз ҳуш рафтан дар дохили ҳавопаймои самти Томск - Москваро ба ёд овардааст.
Ба аёдаткунандагон ҳамакнун иҷозаи дидор бо Навалнийро додаанд. То ин замон пизишкон танҳо ба ҳамсари вай иҷозат медоданд, ки ба ҳузури Навалний дарояд. Аммо барои вуруд ба утоқи Навалний бояд аз се нуқтаи тафтиши пулис гузашт. Кира Ярмиш, сухангӯи Навалний иттилоъ дод, ки дар хабари расонаҳо ҳарфҳои зидду нақиз зиёд аст.
Ин дар ҳолест, ки пештар аз ин расонаҳо навиштанд, мухолифи рус Алексей Навалний бо охирин навъи маводи заҳролудкунанда заҳролуд шудааст. Ин мавод оҳиста таъсир карда, аммо назар ба "Новичок" хатарноктар аст.
Ба назари рӯзноманигорон, коркарди ин навъи заҳр танҳо дар озмоишгоҳҳои хадамоти махсус имкон дорад. Бинобар ин, гуфта мешавад, амалиётҳоро бо истифода аз маводи мазкур танҳо Хадамоти федеролии амнияти Русия ё ФСБ анҷом дода метавонад.
Бино ба навиштаи Die Zeit, мақомоти Олмон мегӯянд, эҳтимол дорад, гумоштаи хадамоти махсус чой ё қисмати болоии финҷонеро заҳролуд кардааст, ки Навалний аз он нӯшида буд. Боқимондаҳои заҳр дар дастони мухолифи рус ва зарфе пайдо шуданд, ки аз он об нӯшидааст.
Нашрия менависад, тибқи нақшаи ҷинояткорон, ки бо назардошти замони таъсири заҳр тарҳрезӣ шуда буд, Навалний бояд ҳангоми парвоз аз Томск ба Москва, дар дохили ҳавопаймо ҷон медод. Вале ӯ бо шарофати зиракии халабон, ки тасмим гирифт, зуд ҳавопайморо ба замин шинонад ва табибони "ёрии таъҷилӣ", ки кори худро фавран анҷом доданд, наҷот ёфт.
Навалний рӯзи 20 июл дар ҳавопаймое аз Томск ба Маскав худро бад ҳис кард ва ҳавопаймо маҷбур шуд дар шаҳри Омск нишинад. Баъди ду рӯзи бистарӣ шудан дар беморхонаи маҳаллӣ Навалнийро ба Олмон интиқол доданд ва табибони беморхонаи “Шерите” баъди чанд рӯзаш гуфтанд, ки сиёсатмадори 44-солаи рус заҳролуд шудааст.
Ҳоло ӯ ба ҳуш омада, мавриди муолиҷа қарор дорад. Тарафдорони Навалний гуфтанд, ки ӯро қасдан заҳролуд карданд ва дар пушти ин ҳодиса Кремл истодааст.