Конвенсияи Монтрё равуои киштиҳоро аз тангнои Босфор ва Дарданеллӣ танзим мекунад.
Дар номаи бозе, ки зери он бештар аз 100 роҳбари баландмақоми неруҳои дарёии Туркия имзо гузоштаанд, мансабдорони давлатӣ танқид шудаанд. Маркази матбуотии президенти Туркия Раҷаб Эрдуғон гуфт, дар номаи мазкур нишонаҳои табаддулоти давлатӣ дида мешавад.
Додситонии он кишвар рӯзи 4 апрел бо гумони эҳтимоли даст доштани адмиралҳо дар ҷиноятҳои вобаста ба барҳам задани субот ва амнияти давлативу тартиботи конститутсионӣ тафтишотро шуруъ кард.
Моҳи гузашта мақомоти Туркия нақшаи кандани канал ё наҳри бузургеро дар баробари Босфор - аз баҳри Сиёҳ ба баҳри Мармар шуруъ карданд. Мақомоти расмӣ гуфтанд, фаъолияти ин каналро конвенсияи Монтрё танзим намекунад. Адмиралҳои бознишастаи неруҳои дарёии Туркия, ки айни ҳол дар барҳам задани амнияти давлатӣ гумон мешаванд, гуфтанд, маҳз кандани канали нав боиси заъиф шудани амнияти давлатӣ хоҳад гардид.
Конвенсияи Монтрё соли 1936 дар Швейтсария қабул шудааст. Ин конвенсия истиқлоли Туркияро дав мавриди тангнои Босфор ва Дарданелл барқарор кард. Ин конвенсия ба киштиҳои тиҷории ҳамаи кишварҳо, чи дар замони осоишта ва чи дар замони ҷанг, ҳаққи убур аз тангнои Босфорро медиҳад.