Ссылки доступа

Орусияда Навальныйды колдоо акцияларынын алдында активисттер кармалууда


Орусиянын бир топ шаарларында активисттер менен журналисттер кармалып, үйлөрү тинтүүгө алынууда. Бүгүн оппозициялык саясатчы Алексей Навальныйдын тарапташтары аны колдоо акцияларын өткөрүүнү пландашкан.

Москвадагы «Автозаводская» метро станциясынын жанынан оппозициячынын тарапташы Любовь Соболь кармалды. Бул тууралуу «Твиттердеги» баракчасы аркылуу анын адвокаты Владимир Воронин билдирди. Анын айтымында, полиция кызматкерлери Соболду таксиден чыгарып, Дон райондук ички иштер башкармалыгынын алдында кичи автобуста кармап турушат.

Москвадагы үйүнүн жанынан Навальныйдын басма сөз катчысы Кира Ярмыш да кармалды. Бул тууралуу анын адвокаты Вероника Полякова билдирди.

Соболь менен Ярмышка январда өткөн Алексей Навальныйды колдоо акцияларынан кийин санитардык-эпидемиологиялык эрежелерди бузууга шыкакчы болгон деген айып тагылган.

Санкт-Петербург шаарында полиция кеминде алты активисттин үйүндө тинтүү жүргүздү. Алардын арасында «Весна» кыймылынын координаторлору Евгения Затеева менен Валентина Хорошенина бар. Маалыматтарга караганда, тинтүү иштери январда Алексей Навальныйды колдоо митинги учурунда жолдордун тосулушу боюнча козголгон кылмыш ишине байланыштуу.

Ал арада «ЯГражданин» платформасынын редактору Александр Бабушкиндин үйү да тинтүүгө алынганы кабарланууда. Полиция кызматкерлери анын ноутбугун алып кетип, өзү суракка келиши керектигин айтышкан.

Мындан тышкары «Альянс учителей» уюмунун Петербургдагы бөлүмүнүн лидери Даниил Кендин үйүндө да тинтүү жүрүп, өзү полиция бөлүмүнө жеткирилди.

Курган шаарында Навальныйдын жергиликтүү штабынын кызматкери Софья Лопатина кармалды. Мындан тышкары полиция күн мурун камалган штабдын координатору Алексей Шварцтын сүйлөшкөнүн кызын кармап кетишти.

Нижний Новгород шаарында Роман Тимченко кармалды. Буга анын «ВКонтакте» социалдын түйүнүндөгү баракчасына 21-апреледеги акция тууралуу жазган билдирүүсү себеп болгон.

31-марттан бери абакта ачкачылык кармап жаткан Навальныйдын тарапташтары элди 21-апрелде саясатчыны колдоп митингдерге чыгууга чакырышкан. Навальный ага көз карандысыз дарыгерлерди киргизүүнү талап кылууда.

Орусиянын Башкы прокуратурасы менен Ички иштер министрлиги жарандарды уруксат берилбеген митингдерге чыкпоого чакырып, бул үчүн «Массалык башаламандык» беренеси боюнча кылмыш иши козголушу мүмкүн экенин эскерткен.

XS
SM
MD
LG