Вакилон дар ҷаласаи 3 июн аз девони вазирон ва шаҳрдории Бишкек хостанд, ки ба мушкили корпартоии ронандагони мусофирбар зудтар расидагӣ шавад. Вакил Ирина Карамушкина шаҳрдории пойтахти Қирғизистонро барои нотавонмандияш дар ҳалли саривақтии мушкили сокинон танқид кард.
Корпартоии ронандагони мусофирбарҳо дар шаҳри Бишкеки Қирғизистон рӯзи 3 июн низ идома ёфт. Онҳо 2 июн бо талаби боло бурдани нархи роҳкиро корпартоиро оғоз карда буданд.
Ду рӯзи пеш намояндаи ширкати мусофиркашонӣ шаҳрдориро аз тасмими корпартоии мусофиркашонҳо огоҳ карда буд. Мусофиркашонҳо боло бурдани қимати роҳкироро талаб доранд.
Дар Бишкек 42 ширкат хадамоти мусофиркашониро таъмин мекунанд. Дар ин ширкатҳо наздики се ҳазор нақлиёти ҷамъиятӣ ба фаъолият машғул аст. Ҳаққи роҳкиро рӯзона 10 сом (муодили тақрибан 1,5 сомонӣ) ва шабона 12 сом (муодили қариб 1,8 сомонӣ)-ро ташкил медиҳад. Мусофиркашҳо мегӯянд, ин маблағ харҷи онҳоро намепӯшонад.
Мусофиркашҳои Бишкек зимистон низ талаби бештар кардани роҳкироро доштанд. Он замон онҳо талаб карда буданд, ки роҳкиро аз 10 сом ба 20 сом расонида шавад.