Ссылки доступа

Жаныбарларды коргоочулар: Нур-Султандын бийлиги шаар аймагындагы көлдөрдү жок кылууда (видео)


Талдыкөл аймагындагы парктын эскизи.
Талдыкөл аймагындагы парктын эскизи.

Нур-Султанда жаныбарларды коргоочулар менен жергиликтүү тургундар аткаминерлерди миңдеген канаттуулар жашаган Кичи Талдыкөлдү жок кылууга аракет кылып жатат деп айыпташууда. Калаа бийлиги ал жерге турак-үйлөрдөн жана эс алуу жайларынан турган туристтик комплекс курууну пландап жатат.

Кичи Талдыкөл – шаардын аймагындагы майда көлдөрдөн турган аймак. Анда көптөгөн канаттуулар, анын ичинде Кызыл китепке киргизилген куштар да жашайт.

В Нур-Султане экозащитники обвиняют чиновников в уничтожении озер
пожалуйста, подождите

No media source currently available

0:00 0:03:28 0:00

"Курулуш иштери башталгандан бери көлдүн айланасы соолуп, канаттуулар учуп кете баштады. Жөнөкөй адам катары шаардын ичиндеги кичинекей жаратылыштын бөлүгүн сактап калууга болот деп эсептейм", – деди Ирина Антонова аттуу шаар тургуну.

Экологдордун айтымында, бул аймакта курулуш иштерин жүргүзүү — көлмөлөрдүн сакталышын кепилдеген Казакстандын эл аралык милдеттенмелерине каршы келет.

"Жарандардын нааразылыгына жооп катары акимчиликтин демилгеси менен жумушчу топ түзүлгөн. Алар бир же эки гана жолу жыйын өткөрүп, андан кийин чогулган жок. Мүчөлөрү бизди тоготпой, суроолорубузга жооп бербей жатышат. Жумушчу топ элди алаксытуу, иштеп жаткандай түр көрсөтүү үчүн түзүлгөндөй сезилүүдө. Анткени азырынча ал эч кандай иш кыла элек", – деди экологиялык активист Айдана Сабденова.

Быйыл апрель айында Нур-Султан акимчилиги өз сайтына борбор шаардын башкы архитектору Нурлан Уранхаевдин билдирүүсүн жарыялаган. Анда ал Кичи Талдыкөл көл эмес экенин, болгону суу топтоочу жер экенин билдирген. Мындан тышкары аткаминер былтыркы экспертизанын жыйынтыктарына таянып, Талдыкөлдүн суусунда кооптуу заттар бар экенин белгилеген.

"Изилдөөгө ылайык, сууда темирдин топтолуусу нормадан алты эсе, хлориддики тогуз эсе жана аммиактыкы беш эсе көп экени белгиленүүдө. Суунун түсү экинчи категорияга туура келет. Бул суунун өтө булганганын, жаныбарлардын жашоосуна ылайыксыз экенин көрсөтүп турат", – деген Уранхаев.

Ошол эле маалда ал адистер көлдөгү суунун үлгүлөрүн ичүүчү жана турмуш-тиричиликте колдонуучу суунун стандарттары боюнча текшергенин айткан эмес. Тагыраагы, Талдыкөлдөгү сууну ичүүгө болбойт, анда жуунуу да сунушталбайт. Бирок көл канаттуулар үчүн өтө ыңгайлуу жер.

Экологдор бирлигинин башчысы Лаура Маликованын айтымында, аткаминерлер Кичи Талдыкөлдү суу фондунан чыгарып, калктуу конуш категориясындагы тилкеге кошуу менен аны юридикалык коргоодон ажыратышкан.

"Алар Талдыкөлгө көл катары эмес, жер тилкеси катары карап жатышат. Ал суу фондунун балансында турганда Суу кодексинин нормаларына ылайык корголчу. Эми анын категориясы өзгөртүлгөндөн кийин ал үчүн Суу кодексинин нормалары иштебейт. Мындай аракети менен аткаминерлер жаратылышка каршы кылмыш жасады деп айтса болот", – деди Маликова.

Шаар тургундары менен экологдор бийликти жок дегенде канаттуулар уялап жаткан азыркы мезгилде Талдыкөлдү кургатуу иштерин токтото турууга чакырып жатышат. Азырынча акимчилик алардын бул өтүнүчү боюнча үн ката элек.

XS
SM
MD
LG