Ссылки доступа

Сарвазири пешини Қирғизистон Темир Сариев ҳам боздошт шуд


Кумитаи давлатии амнияти миллии Қирғизистон хабар дод, ки сарвазири пешини ин кишвар Темир Сариев ҳам боздошт шудааст.

Ба иттилои кумита, Сариев дар доираи парвандаи фасодкорӣ дар иҷрои тарҳи коркарди кони тилои "Қумтор"-и Қирғизистон дастгир гаштааст.

"Сариев ҳангоми вазири иқтисод ва ҳамзамон раиси комиссияи дахлдор буданаш ҳаҷми хисороти зистмуҳитиро дар пайи коркарди кони "Қумтор" чандин миллиард сом кам нишон додааст", - афзудааст кумита.

Дар доираи парвандаи кони тилои "Қумтор" то ин замон вакилони кунунии порлумон Асилбек Ҷеенбеков ва Торобой Зулфиқоров, вакилони пешин Исҳоқ Пирматов ва Талантбек Узакбоев, инчунин сарвазири пешини Қирғизистон Омурбек Бабанов боздошт шудаанд. Ахиран президенти нахустин ва фирории Қирғизистон Аскар Оқоқев низ дар доираи ин парванда ба ватан оварда шуд.

Порлумони Қирғизистон рӯзи 17 май ба девони вазирон дастур дод, ки дар ширкати "Қумтор Голд Компани" мудирияти муваққат ҷорӣ кунад.

Қумтор калонтарин кони тилои Қирғизистон ба ҳисоб меравад. Онро ширкати канадагии Centerra Gold Inc. коркард мекард.

XS
SM
MD
LG