Матни онро Департаменти давлатии ИМА рӯзи 28 октябр нашр кард.
Дар ҳайати кишварҳои Эътилоф барои озодии расонаҳо Украина, Австралия, Канада, Ҷумҳурии Чех, Дания, Фаронса, Олмон, Юнон, Исландия, Латвия, Литва, Ҳолланд, Зеландияи Нав, Мақдунияи Шимолӣ, Словакия, Словения ва Британияву ИМА шомил ҳастанд.
Муаллифони изҳорот гуфтаанд, "дар робита ба таъқибҳои рӯзафзуни ҳукумати Русия нисбати рӯзноманигорон ва расонаҳои мустақил дар Русия амиқан нигарон ҳастем." Дар изҳорот ҳамчунин омадааст, "озодии расонаҳо барои фаъолияти муассири ҷомеаи бозу озод ҳаётӣ буда, барои ҳифзи ҳуқуқи инсон ва озодиҳои усулӣ низ аҳамият дорад".
Мақомоти Русияро айбдор мекунанд, ки таъқибҳо зидди расонаҳои мустақил, гуруҳҳои ҷомеаи шаҳрвандӣ, ҳомиёни ҳуқуқ ва дигар афродро бо истифода аз қонун дар бораи афрод ва гуруҳҳои "номақбул", инчунин қонуни маъруф ба "агентҳои хориҷӣ" бештар кардааст.
Муаллифон аз ҳолатҳои зиёде ёдовар шудаанд, ки чи гуна расонаҳо ва рӯзноманигорон мавриди таъқиби мақомоти Русия қарор гирифтаанд.
Дар поёни нома муаллифон аз Кремл даъват кардаанд, ки "уҳдадориҳои байналхалқиашро дар мавриди ҳифзи ҳуқуқи инсон иҷро, озодии расонаҳо ва амнияти рӯзноманигоронро таъмин кунад".