Ссылки доступа

Москванын бийлиги курулуштардагы чет өлкөлүктөрдөн баш тартуу планын иштеп чыгууда


Москванын мэриясы шаардагы курулуштарда иштеген чет өлкөлүк жумушчулардан баш тартууу планын иштеп чыгууда. Бул тууралуу шаар куруу саясаты жана курулуш маселелери боюнча вице-мэр Андрей Бочкарев РБКга берген маегинде билдирди.

Анын айтымында, курулуш процесси "үч эсе аз адамды талап кылып", ошол эле маалда жумушчулардын айлыгы "эки же үч эсе көп болуп, курулуш иштери эки эсе тез жүрүшү керек".

Вице-мэр АКШ менен Европа өлкөлөрүн мисал келтирип, ал жакта жумушчулар "кыйла жакшы даярдалганын", мындан улам "бир киши үч кишинин ишин аткара турганын" белгиледи.

"Азыр Москвадагы бир нече курулушта ушуга окшогон система киргизилүүдө: план боюнча жумушчулар 450 болсо, жалданма компания ишти 170 киши менен гана аткарып жатат", — деди Бочкарев.

Анын айтымында, бүгүнкү күндө шаардагы курулуштарда иштеп жүргөн 120 миң чет өлкөлүктүн "40 миңден ашыгы гана калды". Бул негизинен Кыргызстан менен Өзбекстандын жарандары.

Бочкарев курулушта орточо айлык 30 миң рублдан 50-60 миң рублге чейин жогорулаганын, "бирок көпчүлүгү 80 миң рублге да иштегиси келбей жатканын" белгиледи.

Сентябрда Москванын бийлиги шаарда 200 миңге жакын чет өлкөлүк жумушчу жетишпей жатканын билдирген. Ага чейин мэр Сергей Собянин эмгек мигранттарынын кетиши инфляциянын өсүшүнө таасирин тийгизгенин билдирген. Анын айтымында, былтыр коронавирустук чектөөлөргө байланыштуу курулуштун көбү токтоп, жумушчулар мекенине кетип калышкан.

Орусияда коронавирус пандемиясына байланыштуу мигранттардын өлкөгө кирүүсүнө 2020-жылы март айында тыюу салынган. Быйыл жазында кирешеси 2,5 миллиард рублден көп жана 250дөн ашпаган киши иштеген компанияларга чет өлкөдөн жумушчуларды алып келүүгө уруксат берилген.

Май айында Өзбекстан менен Тажикстандан жумушчуларды тартууга киргизилген бардык чектөөлөр алынган. Бирок иш жүзүндө бул эч кандай жардам берген эмес: алар дале болсо Орусияга учактар менен гана барышы керек.

XS
SM
MD
LG