Алдамчылык жана сотту сыйлабоо иши бириктирилгени январдын ортосунда белгилүү болгон. Бул эпизоддор боюнча Навальныйды 10 жылга чейин эркинен ажыратуу коркунучу күтүп турганын анын адвокаты Ольга Михайлова билдирген.
Навальныйга жана анын санаалаштарына карата ири өлчөмдөгү алдамчылык боюнча иш 2020-жылы декабрда козголгон. Тергөөнүн версиясына ылайык, алар оппозициячыл саясатчынын фонддоруна кайрымдуулук иретинде түшкөн акчаны максатсыз жок кылышкан. Бул берене боюнча эң жогорку жаза – он жыл эркинен ажыратуу.
Алексей Навальныйга карата сотко акарат келтирүү боюнча кылмыш иши козголгону былтыр майда белгилүү болгон. 2021-жылы февралда Москвадагы райондук сот Навальныйды ветеран Игнат Артеменкого жалаа жапкан деп айыптап, 850 миң рубль айып пул төлөөгө милдеттендирген. Ветеран Конституцияга түзөтүүлөрдү колдогон видео роликке тартылган болчу. Жараян учурунда Навальный судья Вера Акимованы адилетсиздикке айыптап, он жолу эскертүү алган.
Судья Акимова сот жыйыны аяктагандан кийин оппозиционердин "акарат келтирген" билдирүүлөрүн текшерүү үчүн материалдарды Москванын тергөө комитетине жөнөтөрүн айткан.
25-январда орус бийлиги камактагы Кремлдин келишкис сынчысы Алексей Навальныйды жана анын бир нече санаалашын "террорчулардын жана экстремисттердин" тизмесине кошкон.
Навальный "Ив роше" иши боюнча 2,5 жылга кесилген, ал мунун саясий мүдөөсү бар экенин айтып келет.
Былтыр Мосгорсуд Навальныйга байланышы бар баардык уюмдарды "экстермисттик" деп тапкан. Бул уюмдар менен кызматташкан адамдар да узак убакытка кесилиши мүмкүн.
