Ссылки доступа

Хорогдун жашоочулары аймакта абал тынч эмес экенин билдирүүдө


Тажикстандын бийлиги Тоолуу Бадахшан автоном облусунун бейформал лидерлеринин бири Мамадбокир Мамадбокиров менен анын алты шеригине укук коргоо органдарына өз эрки менен келүүгө бир жума убакыт берди.

Жергиликтүү жашоочулардын айтымында, аскерлер Мамадбокир Мамадбокировдун Хорогдогу үйүнө жакын жерге жайгашууга аракет жасашты, бирок эл буга тоскоолдук кылды. Хорогдун бир нече тургуну көчөнү түнкүсүн өтө көп киши кайтарып турганын белгиледи.

Тоолуу Бадахшан автономдуу облусунун администрациясынын маалымат катчысы Голиб Ниятбеков соцтармактардын колдонуучулары чындыкка дал келбеген маалыматтарды бөлүшүп жатканын билдирди.

"Хорогго кошумча аскердик күч жөнөтүлгөнү, кишилер түнчүндө көчөгө чыкканы жөнүндө маалымат жалган. Абал тынч, жашоочулар күнүмдүк иш менен алек. Чет өлкөдө жашаган кишилер барын ойлоп таап, бүлгүн салып жатышат. Облуста бийлик менен элдин мамилеси жакшырды"- деди ал.

"Озоди" радиосу 6-февралда Мамадбокир Мамадбокировдун өзү менен телефон аркылуу байланышканда ал бош эместигин, азыр сүйлөшө албай турганын айткан.

Бул арада Хельсинки комитетинин Борбор Азиядагы өкүлү Мариус Фоссум "Твиттер" аркылуу тажик бийлигине кайрылып, Хорогдогу куугунтуктоо жана кыйноону токтотууга чакырды. "Хорогдон кооптондурган маалыматтар келип жатат. Тажикстан бийлиги кагылышуу жана кан төгүлүү ыктымалдуулугунун алдын алышы керек", — деп жазды Фоссум.

Февралдын башында Тоолуу Бадахшан автоном облусунун прокуратурасы Мамадбокировго каршы төрт кылмыш ишин козгогон. Буга облустун билим берүү башкармалыгынын башчысы Лутфулло Наврузовдун Мамадбокиров тарабынан катуу сабалганы жөнүндө видеокайрылуу жасаганы себеп болгон. Мамадбокиров Новрузов менен чындап эле "бир тууганча" сүйлөшкөнүн, бирок сабабаганын айткан.

Анын жанындагы алты киши болсо былтыр 25-28-ноябрда нааразылык акцияларына байланыштуу укук коргоо органдарына чакыртылууда.

2021-жылы 25-ноябрда тажик күч түзүмдөрү Тоолуу Бадахшан облусунун Шохдар айылында атайын операция жүргүзүп, анда жергиликтүү тургун Гулбиддин Зиёбеков өлтүрүлгөн. Андан кийин жүздөгөн адам Хорог шаарындагы облустук администрациянын имаратынын алдына чогулуп, Зиёбековду өлтүргөн күч кызматкерлерин жазалоону талап кылышкан. 28-ноябрда бийлик жергиликтүү тургундун өлүмү боюнча объективдүү тергөө жүргүзүүнү, митингге чыккандарды куугунтуктабоону жана аймакка кайра интернет берүүнү убадалагандан кийин акция катышуучулары тараган.

XS
SM
MD
LG