Сухангӯи СММ Алессандра Велуччӣ 22 феврал гуфт, созмон бо вуҷуд корашро дар Украина, аз ҷумла дар минтақаҳои шарқии он фаъолона идома медиҳад.
"Мо фаъолияти худро бо тамоми неру идома медиҳем", - афзуд ӯ. Аммо ба гуфтаи Велуччӣ, созмон бо назардошти вазъ ба як қисми кормандонаш иҷозат додааст, ки ҳамроҳи хонаводаҳояшон муваққатан Украинаро тарк кунанд.
Ба иттилои сухангӯи СММ, дар Украина ҳудуди 1,5 ҳазор нафар дар ин созмон кор мекунанд. Ҳудуди сад нафари онҳо дар минтақаҳои таҳти идораи ҷудоихоҳон фаъолият доранд.
Президенти Русия Владимир Путин шаби 21-уми феврал дар як паёми телевизионӣ истиқлолияти Луҳанск ва Донетски Украина, минтақаҳои таҳти назорати ҷудоихоҳони зери ҳимояти Маскавро эътироф кард. Ӯ дертар дастур дод, ки нерӯҳои ин кишвар ба минтақаҳои ҷудоиталаб дар шарқи Украина дохил шаванд. Раҳбарони кишварҳои ғарбӣ тасмими Маскавро ба шиддат маҳкум карда, ваъда додаанд, ки таҳримҳои сахтеро алайҳи Русия ҷорӣ хоҳанд кард.