Ссылки доступа

Казакстандык сүрөтчүлөр Украинаны колдоп кайрымдуулук көргөзмөсүн уюштурушту


Казакстандык сүрөтчү Асхат Ахмедьяров
Казакстандык сүрөтчү Асхат Ахмедьяров

Алматыда белгилүү казакстандык сүрөтчүлөр украиналыктарды колдоп кайрымдуулук көргөзмөсүн уюштурушту. Алардын эмгектерин сатуудан түшкөн каражаттын баары Украинанын Казакстандагы элчилигине берилет.

Кайрымдуулук көргөзмөсүнө Рашид Нурекеев, Сауле Сулейменова, Куаныш Базаргалиев, Асхат Ахмедьяров, Зоя Фалькова, Акмарал Жиенгалиева өңдүү белгилүү сүрөтчүлөрдүн эмгектери коюлган. Мындан тышкары учурда Украинанын Харьков шаарында жүргөн украиналык сүрөтчү Александр Обединдин 11 эмгегине көргөзмөдө өзүнчө орун бөлүнгөн.

Сүрөтчү Асхат Ахмедьяров көргөзмөгө Казакстандын тарыхындагы талаштуу кабыл алынган учурга – казактардын Экинчи дүйнөлүк согушка фашисттик Германиянын тарабында катышуусуна арналган бир нече эмгегин койгон.

— Бул темага кайрылганымдын себеби — азыр ал бүгүнкү учур менен айкалышууда. Азыр Токаев Украина менен согушта Путинди жашыруун колдой турганы айтылууда. Буга чейин Орусиянын чек арасын көздөй бараткан Казакстандын аскердик техникалары жөнүндө кабар тараган. Мени ушул көрүнүштөр тынчсыздандырып жатат. Менин сүрөттөрүмдөгү Түркстан легиону көрсөтүлгөн согуш темасы азыркы саясий абалга жана Орусиянын бачкынчылык-фашисттик аракеттерине окшоп турат", — деди Ахмедьяров.

Уюштуруучулардын бири Жанна Спунердин айтымында, көргөзмө өткөрүү идеясы сүрөтчү Акмарал Жиенгалиевага таандык. "Биз сүрөтчүлөргө кайрылып, алардын эмгектерин чогулта баштадык. Бир нече күндөн кийин Харьковдогу досубуз Александр Обедин телефон чалып калды. Ал көргөзмө тууралуу эч нерсе билчү эмес, сүрөттөрүн сатып, түшкөн акчаны украин элчилине жеткирүүгө жардам сурап кайрылыптыр. Биз анын 11 эмгегин алдык. Азыр ал ракеталык соккулардан жашырынып үйүнүн жертөлөсүндө отурат", — деди Спунер.

Көргөзмөгө коюлган сүрөттөрдүн баалары ар кандай — он миңдеген теңгеден миллион теңгеге чейин. Жанна Спунердин айтымында, сүрөтчүлөрдүн бардыгы эмгектери тез өтүп кетсин деп бааларды төмөн коюшкан. "Бул жерде сүрөттөрү чет өлкөлөрдө гана сатылып келген дүйнөлүк деңгээлдеги сүрөтчүлөрдүн эмгектери коюлду", — деп кошумчалады ал.

Орусиянын президенти Владимир Путиндин "Донбасстагы калкты коргоо" тууралуу билдирүүсүнөн кийин орус аскерлери 24-февралда Украинага басып кирген. Дээрлик бир айдан бери Украинанын бардык аймактарында аткылоо жана бомбалоо уланууда. БУУнун маалыматына караганда, бул аралыкта 900дөн ашык жай тургун каза болду, алардын ичинде 100дөн ашуун бала бар. Адистер чыныгы сандар мындан кыйла көп болушу мүмкүн экенин айтып жатышат. Эки тараптан курман болгон аскер кызматкерлеринин саны миңдеп саналат.

XS
SM
MD
LG