Уюмдун расмий сайтына 25-мартта жарыяланган билдирүүдө Бишкекте жарандардын эркин жыйындарга чогулуп, пикирин эркин билдирүү боюнча мыйзамдуу укугун чектеген чечимдерди жокко чыгаруу чакырыгы да айтылды.
Эл аралык уюм кыргыз бийлигин бейөкмөт уюмдар тууралуу 2021-жылы күчүнө кирген мыйзамды да жокко чыгарууга үндөдү.
Федерация укук коргоочулар Азиза Абдирасулова, Динара Ошурахунова, Өндүрүш Токтонасыров жана алардын жактоочусу Нурбек Токтакунов мыйзамдуу ишмердүүлүгүн тоскоолдуксуз жана куугунтук коркунучусуз жүргүзүүгө укуктуу экенин белгиледи.
1922-жылы түзүлгөн "Адам укуктары боюнча эл аралык федерация" уюмуна жүздөн ашуун өлкөнүн эки жүзгө чукул укук коргоо уюму мүчө.
Быйыл 5-мартта Орусиянын Кыргызстандагы элчилигинин алдында жарандык активисттер тобу Орусиянын Украинада согуш жүргүзүшүнө каршы акция өткөрүшкөн. Алардын бири Мирлан Асакеевди милиция кармап кетип, Жазык кодексинин "Ички иштер органынын кызматкеринин мыйзамдуу талабына баш ийбөө" беренесинин негизинде 3 миң сом айыппул салган.
7-мартта ошол эле жерде Орусияны колдогон акция өткөн. Алардын эч кимиси кармалган эмес.
Бишкек милициясынын Орусиянын элчилигинин, парламент жана өкмөт имараттарынын, борбордук аянттын аймагында 11-марттан 11-апрелге чейин акция өткөрүүгө тыюу салган чечимин 16-мартта Биринчи май райондук соту күчүндө калтырган.
17-мартта укук коргоочулар Өндүрүш Токтонасыров, Динара Ошурахунова, Азиза Абдирасулова элчилик алдына Украинадагы баскынчылык аракеттерди токтотуу талабы менен пикетке чыгышкан. Аларды милиция кармап кеткен. Кийин сот үчөөнө 3 миң сомдон айыппул салган.
24-мартта Биринчи май райондук соту үч укук коргоочунун адвокаты Нурбек Токтакуновду судьяларды тилдеген деген негизде беш суткага камоо тууралуу чечим чыгарган. 28-мартта райондук соттун бул чечимин шаардык сот күчүндө калтырды. Ал 25-марттан бери милициянын убактылуу кармоочу жайында отурат.