Ссылки доступа

Стамбулда Украина жана Орусия өкүлдөрүнүн сүйлөшүүсү башталды


Түркиянын Стамбул шаарындагы Долмабахче сарайында Украина жана Орусия өкүлдөрүнүн сүйлөшүүлөрү башталды. Бул тараптардын марттын ортосунан берки алгачкы бетме-бет жолугушуусу.

Сүйлөшүүнүн жүрүшүндө эки өлкөнүн өкүлдөрү гуманитардык маселелерди талкуулап, ок атууну токтотуу тууралуу макулдашууга аракет кылат деп күтүлүүдө. Тараптардын буга чейинки бир нече жолку сүйлөшүүсү видеобайланыш аркылуу өткөн.

Жолугушуу башталардын алдында бул сүйлөшүүлөрдү өткөрүүнү демилгелеген Түркиянын президенти Режеп Эрдоган катышуучуларга кайрылды: "Азыр биз сүйлөшүүлөрдүн конкреттүү жыйынтыктары болушу керек деген маалга келдик. Болушунча тез арада ок атууну токтотуу бардыгыбыздын кызыкчыгыбызда. Сүйлөшүүлөрдө жылыштар болуп, өз кезегинде ал эки өлкө лидерлеринин жолугушуусуна жол ачылат деп үмүттөнөм", - деди Эрдоган.

Буга чейин Украинанын тышкы иштер министри Дмитрий Кулеба жергиликтүү телеканалдардын эфиринде сүйлөшүүлөрдүн негизги максаты биринчи кезекте "гуманитардык маселелерди чечүү" болорун, "ок атышууну токтотуу, бул багытта туруктуу макулдашууга жетишүү экенин" айткан.

Financial Times басылмасы төрт маалымат булагына шилтеме кылып, бул сүйлөшүүлөрдө Орусия Украинаны денацификациялоо, демилитаризациялоо жана орус тилин коргоо өңдүү талаптарынан баш тартканын жазды.

Буга чейин Украинанын президенти Владимир Зеленский эгер Украина өзүнүн коопсуздугуна Орусиядан жетиштүү кепилдик алса, НАТОго кирүү планынан баш тартышы мүмкүн экенин ачык айткан.

Украинанын сүйлөшүү тобунун мүчөсү Давид Арахамия Financial Times басылмасына берген маегинде тараптар коопсуздук кепилдиги жана Украинанын Европа биримдигине кирүү ыктымалдыгы боюнча макулдашууга келүүгө жакын экенин билдирген.

Орус делегациясынын башчысы Владимир Мединский "экинчи маанидеги маселелер боюнча тараптардын позициялары жакындап жатканын", бирок башкы саясий маселелер боюнча эч кандай жылыш жок экенин билдирген. Анын айтымында, Донбасс менен Крымдын макамы боюнча тараптардын позициялары болушунча алыс бойдон калууда.

21-мартта Украинанын президенти Владимир Зеленский өлкөнүн коопсуздугу, Донбасс менен Крымдын макамы жөнүндөгү масалелер жалпы украиналык референдум аркылуу чечилерин айткан. "Орусия менен сүйлөшүүлөрдөгү компромисстердин форматына эл гана жооп бериши керек. Бирок кандайдыр бир компромисс жөнүндө сөз кылуудан мурда орус армиясы 24-февралга чейин ээлеп турган позицияларына кайтышы керек", - деген Зеленский.

Видео

Видео

Экинчи аял: "Жашынган жашоодон тажадым"
пожалуйста, подождите

No media source currently available

0:00 0:34:33 0:00
XS
SM
MD
LG