Дар Бунёд гуфтанд, "маркази солимгардонӣ дар майдони 2,7 га дар деҳаи Кой-Тош, ки 1385,5 метри мураббаъ бино дорад, ба тавозуни давлат дароварда шуд".
"Ин биноҳо ба муассисаи махсус барои калонсолон ва маркази солимгардонӣ барои кӯдакон табдил дода мешаванд", - гуфтанд дар Бунёди амволи давлатии Қирғизистон.
Дар наворе, ки дар шабакаҳои иҷтимоӣ нашр гардид, дида мешавад, вакилони мудофеи Алмосбек Отамбоев бо кормандони Бунёди идораи амволи давлатӣ баҳс доранд. Аз наздикони Отамбоев дархост шуд, ки давоми се рӯз манзилро холӣ кунанд.
"Мо бо талаби қонунӣ инҷо омадем, ин амволи давлат аст", - гуфт Канат Рисқулов, намояндаи дигари Бунёди амволи давлатии Қирғизистон.
Сергей Слесарев, вакили мудофеи Отамбоев гуфт, ки хонаводаи президенти пешин дар бораи давлатӣ кардани манзил огоҳӣ надошт.
"На мо, на хонаводаи президенти пешин ҳеч санади тасдиқкунанда надорем. Санаде ба мо диҳед, ки мо онро баҳо дода тавонем. Ҳоло шумо мегӯед, ки ин манзил давлатӣ аст. Дар кадом асос? Бе ҳузури Отамбоев шумо санад тартиб додед", - гуфт Слесарев.
Рӯзи 23 июни соли 2020 додгоҳи ноҳияи Якуми майи шаҳри Бишкеки Қирғизистон Отамбоевро ба 11 солу 2 моҳи зиндон, бо мусодираи амвол маҳкум кард. Отамбоевро дар озодсозии ғайриқонунии соҳибнуфузи ҷиноӣ Азиз Батукаев аз зиндон айбдор карданд.