Гезиттин маалыматына караганда, Орусияга каршы санкция жарыяланган маалда лизингде турган 515 учактын 80ин гана кайтарып алууга мүмкүн болгон. Лайнерлердин ээлери Орусиядагы учактардын көбүн кайтарып алууга көздөрү жетпейт. Камсыздандыруу компанияларына жазылган доо арыздын суммасы 10 миллиард долларга жетти. Учактарды эле эмес, ижарага берилген авиациялык кыймылдаткычтарды кайтарып алууда да көйгөйлөр жаралууда.
Гезит ирландиялык AerCap лизинг компаниясынын талабы менен Шри-Ланкада кармалган Аэрофолоттун учагын мисал келтирген. Москва бул өлкө бийлигин мунай жеткирүүнү токтотуу менен коркуткандан кийин лайнерди кайра Орусияга кайтарып берүүгө аргасыз болгон. Бир нече күн Коломбо аэрпортунда кармалган Airbus 330-300 учагы учурда Москвада учууга уруксат алган жана Кыргызстанга каттап жатат.
Орусиянын авиациялык секторуна каршы киргизилген санкция болуп көрбөгөндөй масштабга ээ. Ага Европа, Түндүк Америка жана Азиянын 37 өлкөсү кошулган.
Орусиялык компанияларга учактарды сатуу жана лизингге берүүгө тыюу салынгандан тышкары, тетиктерди, программалык камсыздандырууларды экспорттоого жана учактарга техникалык кызмат көрсөтүүгө бөгөт коюлган.
Мартта Орусиянын президенти Владимир Путин лизингге алынган учактарды ички каттамдар үчүн пайдаланууга уруксат берген жарлыкка кол койгон.
