Ссылки доступа

Тажикстанда экс-судьянын жардамчысы Азиза Хайдаровага дагы эки айып тагылды


Рустам Саидахмадзода жана Азиза Хайдарова

Тажикстанда Согд облусундагы Бобожон Гафуров райондук сотунун мурдагы судьясынын камактагы жардамчысы Азиза Хайдаровага дагы эки айып тагылды. Бул тууралуу "Озоди" радиосу анын жакындарына шилтеме кылып кабарлады.

22 жаштагы Азиза Хайдарованын апасы Барно Хайдарова кызына "Далилдерди жасалмалоо" жана "Акча кымыруу" беренелери боюнча жаңы айыптар тагылганын 17-октябрда укканын билдирди.

"Азизаны Душанбеден Хоженттеги тергөө абагына которушкан. Жаңы айыптар жөнүндө ага тамак-аш алып барганда уктум. Кызым андай кылмыштарга барбаганына ишенем", – деди Хайдарова.

Азиза Хайдарова быйыл 10-июнда Хоженттеги турак жай сатуу-сатып алуу ишиндеги алдамчылыкка айыпталып кармалган. Ага тагылган жаңы айыптар да ошол ишке байланыштуу.

Барно Хайдарованын айтымында, кызы эч кандай мыйзамсыз иш жасаган эмес. Тергөөчүлөр аны мурдагы жетекчиси – судья Рустам Сайдахмадзодага каршы көрсөтмө берүүгө мажбурлап жатышат. Судья 29-июнда кармалып, тергөө иштери аяктаганга чейин камакка алынган.

Согд облусунун Бобожон Гафуров райондук сотунун судьясы Рустам Сайдахмадзода кармалгандан бир апта өткөндөн кийин ээлеген кызматынан расмий түрдө бошотулду. Тажикстан президентинин 6-июлдагы жарлыгында Сайдахмадзода “соттордун ар-намысын булгаган иштерге барганы үчүн” кызматтан алынганы белгиленген.

43 жаштагы Сайдахмадзода “кызмат абалынан ашкере пайдаланууга” жана “кылмыш жөнүндө жалган маалымат берүүгө” айыпталууда. Бирок ал өзүн күнөөлүү деп эсептебейт.

Видео

XS
SM
MD
LG