Ссылки доступа

Сеулдагы Хэллоуин майрамы учурунда өлгөн казакстандык Кореяда магистратурада окуп жаткан


29-октябрда Хэллоуин майрамы учурунда каза болгон Актөбө шаарынын тургуну Мадина Шерниязова Сеулдагы жогорку окуу жайлардын биринде магистратурада окуп жүргөн.

Маркумдун апасы Гүлбану Шерниязованын айтымында, Мадина Хэллоуин майрамына бара жатып ага видео аркылуу байланышкан. Достору менен бирге баратканын жана майрамдык маанайда экенин көрсөткөн.

26 жаштагы Мадина Шерниязова Актөбө шаарындагы №27 орто мектепте окуган. Казан федералдык университетинин чыгыш факультетиндеги корей тили бөлүмүн аяктап, Сеул шаарынын жогорку окуу жайларынын бирине магистратурага өткөн.

№ 27 мектептин директорунун орун басары Алтынгүл Аткиева Мадина окуучу кезде эле тил үйрөнүүгө дилгир болгонун айтты.

— Ал биздин мектепти 2013-жылы аяктаган. Абдан жакшы окуган. Англис тилин терең окуткан классты аяктаган. Андан соң Казан университетине өткөн, - деди Аткиева.

Мадина — үйдөгү эки кыздын кенжеси, корей тилин 8-класттан үйрөнүп баштаган.

— Жолдошум Беибит атайын каттам менен Сеулга баруу үчүн Алматыга кетти. Эртең кызыбыздын сөөгүн Актөбөгө алып келет деп үмүттөнөм. Казакстандын Түштүк Кореядагы элчилиги байланышып, көмөк көрсөтүүгө убада берди, - деди Гүлбану Шерниязова.

Түштүк Кореяда Хэллоуин күнүн белгилөөгө чогулгандар арасында жаралган тыгындан улам 150дөн ашуун адам каза тапкан. Окуя 29-октябрда өлкөнүн борбор калаасы Сеулдун Итхэвон деген жериндеги кууш көчөдө болгон. Көз жумгандардын 19у чет өлкөлүктөр экени аныкталган.

Видео

XS
SM
MD
LG