"Мектептеги коопсуздук маселесине баарыбыз тынчсызданабыз. Көрүп отургандай, мектептин ичинде да ар кандай жагдай болот. Коопсуздук маселесин да карап, бардык окуу жайларды текшерүү жөндүү. Видеокамераларды көбөйтүп, кире бериште көзөмөлдү күчөтүү керек", - деди Смаилов.
Анын айтымында, Агартуу министрлиги Ички иштер жана Өзгөчө кырдаалдар министрликтери менен бирге балдарга арналган коопсуздук сабактарын өткөрүүгө даярдык көрүүдө.
2021-жылы Татарстандын Казан шаарындагы мектепте окуучу тогуз кишини атып өлтүргөндөн кийин да Казакстандын өкмөтү ушуга окшош демилге көтөргөн.
13-февралда Казакстандын Петропавл шаарында 9-класстын окуучусу өзү окуган №4 орто мектепке балта жана бычак алып барып, үч курдашын жарадар кылган. Баштапкы маалымат боюнча өспүрүм психиатрдын каттоосунда турган.
Күбөлөрдүн айтымында, 9-класстын окуучусу алгач экинчи кабаттагы ажаатканага кирип, беткап кийген соң далисте бараткан 9-10-класстарда окуган эки бала менен бир кызга кол салган. Аны жогорку класстын окуучулары менен мугалимдер кармашкан.
Жаракат алгандардын бири медициналык кароодон өткөндөн кийин амбулатордук дарыланууга жөнөтүлдү, экөө балдар ооруканасында дарыланууда.