"Азаттыктын" казак кызматы чыгарган видеодо тургундардын бири ачкачылык жарыялоого алардын талаптары аткарылбаганы себеп болгонун айткан.
Жаңы-Өзөндүн жумушсуз калган тургундары 1-апрелден бери шаардык акимчиликтин алдына чогулуп, туруктуу жумуш табууга көмөктөшүүнү талап кылууда. Жергиликтүү бийлик аймакта бош жумуш орундары жок экенин айтып, бир нече жолу алардын талаптарына терс жооп берген.
20-апрелде акцияга чыккан тургундар өлкө президенти Касым-Жомарт Токаевге видеокайрылуу жасап, акимчиликтин алдында түнөшкөн.
Өткөн жумада Жаңы-Өзөндүн жашоочулары шаардагы "Өзенмунайгаздын" кеңсесинин фонунда видеокайрылуу жасап, иш менен камсыз кылууга байланыштуу бир нече талаптарын айтышкан. Алардын арасында туруктуу жана жетиштүү айлыгы бар компанияга жумушка орноштуруу жана Жаңы-Өзөндөгү мунайгаз ишканаларын текшерүүнүн жыйынтыктарын ачык жарыялоо талаптары болгон. Атайын түзүлгөн жумушчу топ майдын башында Жаңы-Өзөндөгү мунай компанияларында ондогон мыйзам бузуулар аныкталганын билдирген.