Министрлик бул жолку чечимин демилгечи топтун тизмеси мыйзамдын талаптарына ылайык түзүлбөгөнү менен түшүндүрдү. Ошол эле маалда мекеме тизме түзүүдө кайсы нормалар бузулганын так билдирген жок.
"Алга Казакстандын" уюштуруу комитети белгилегендей, 5-июлда Юстиция миинстрлигине мыйзам талап кылган 700 кишинин ордуна 3 101 кишинин тизмеси берилген. Алар 1 500 кишинин кол коюп жатканы тартылган видеотасмалар да бар экенин билдирүүдө.
Казакстандын Юстиция министрлиги ушуну менен 2022-жылдын май айынан бери алтынчы жолу "Алга Казакстан" партиясын каттоодон баш тартты. Кыймылдын лидерлеринин бири жана белгилүү марафончу Марат Жыланбаев 25-майдан бери камакта отурат. Ал "Тыюу салынган уюм менен кызматташуу" жана "Экстремисттик уюмдун ишмердүүлүгүн каржылоо" беренелери боюнча шектелүүдө. Жыланбаев өзү бул айыптоолорду четке кагып келет.