Ширкати "QazaqGaz" дар ин бора хабар дода, гуфтааст, корҳои омодагӣ барои интиқоли гази Русия тавассути қаламрави Қазоқистон "фаъолона" идома доранд.
Ҳукумати Узбекистон эълом кард, ки ба хотири бурунрафт аз буҳрони энергетикӣ дар фаслҳои тирамоҳу зимистон мехоҳад, аз Русия газ харад. Вазорати энергетикаи Узбекистон 19 июл гуфт, солона аз Русия 2 миллиарду 800 миллион газ хоҳанд харид ва он талаботи кишвар ба газро "қисман рӯйпуш мекунад". Вале мақомоти узбек намегӯянд, ки бо кадом нарх аз Русия газ мехаранд.
Узбекистон дар миёни кишварҳое, ки ба Чин газ мефурӯшанд, дар мақоми 5-ум қарор дорад. Тибқи иттилои Оҷонси омори Узбекистон, ин кишвар дар шаш моҳи аввали имсол ҷамъан ба маблағи 278 миллиону 400 ҳазор доллар ба хориҷ гази табиӣ фурӯхтааст.
Тибқи омори расмии Пекин, 73 дарсади гази содиршудаи Узбекистонро дар нимсолаи аввал Чин харидорӣ кардааст. Узбекистон моҳи апрели имсол хабар дода буд, ки содироти газро ба Чин дубора оғоз карда, дар ин моҳ ба маблағи 40,5 миллион доллар ба он кишвар газ фурӯхтааст.