Қозоғистонда маҳбусни қийнаган 11 нафар ходим ишдан ҳайдалмоқда

Бу ҳақда Қозоғистон ИИВ ҳузуридаги Жазони ижро этиш қўмитаси хабар берган. Лекин пресс-релиз кейинчалик идора сайтидан ғойиб бўлган.

Шунингдек, ички суриштирув натижаларига кўра, жазони ижро этиш вилоят бошқармаси бошлиғи ва унинг ўринбосарини ҳамда колония раҳбарини эгаллаб турган лавозимдан четлатиш учун тақдимнома киритилган.

Айни дамда прокуратура ҳам тергов ҳаракатларини олиб бормоқда. Бироқ тергов қайси модда бўйича олиб борилаётгани айтилмаган.

Атбасардаги колонияга борган ҳуқуқбон Елена Семенова ўзининг Facebook саҳифасида ёзишича, 5 сентябрь куни колония раҳбари билан бирга 9 нафар ходимни ишдан бўшатиш тўғрисида буйруқ чиққан.

ЖИЭҚ матбуот хизмати Озодликнинг қозоқ хизматига истеъфолар ҳақидаги маълумотни тасдиқламади. Пресс-релиз сайтдан ўчирилиши “техник хато” сифатида изоҳланган. Баёнот кейинчалик ЖИЭҚ сайтига қайта қўйилди. Баёнотда айтилишича, Оқмўла вилоятидаги ЖИЭҚ муассасаси маъмуриятининг қонуний талабларига бўйсунмаслик ҳолатига махсус воситалар ёрдамида чек қўйиш пайтида ходимлар ўз хизмат ваколати доирасидан чиқиши аломатлари кузатилган.

Аввалроқ ижтимоий тармоқларда Атбасар шаҳридаги колония ходимлари Данебаев ҳожатхонани тозалашни рад этгани учун калтаклаётганини акс этган видео тарқалган. Кадрда бир гуруҳ ходим қисқа вақт ичида Данебаевга нисбатан камида икки марта жисмоний куч қўллаган.

Калтаклашдан олдин бир эркак "Махсус жиҳозлардан фойдаланинг" деб буйруқ беради. Иккала ҳолатда ҳам маҳбус бир неча ходимлар томонидан юзини ерга қаратиб ётқизилиб калтакланган. “Мен қийноқларга қаршиман”, дейди видеода Данебаев.

ЖИЭҚ 4 сентябрь куни ички суриштирув бошланганини маълум қилди.

Тимур Данебаев Қозоғистон президенти Қосим-Жомарт Тўқаевни “январь воқеаларида иштирок этган 20 минг террорчи" ҳақидаги иддаолари учун жавобгарликка тортишга уриниши билан машҳур. У 2023 йил июнь ойида нифоқ чиқаришда айбланиб, уч йилга қамалган.

Тимур Данебаев қозоқ ҳуқуқбонлари тузган “сиёсий маҳбуслар” рўйхатига киритилган.