NHC Вуралнинг ўғирланишини Туркия ҳукуматининг 2016 йилда давлат тўнтаришига уринишда айбланган Фатҳуллоҳ Гулен ҳаракатидан олинаётган қасоснинг яна бир намунаси деб атаган.
Корай Вурал Душанбедаги тожик-турк лицейларидан бирининг директори бўлиб ишлаган. Лицейлар ёпилгач, у тадбиркорлик билан шуғулланган. Вуралнинг яқинларига кўра, тадбиркорни 16 сентябрь куни эрталаб Душанбедаги Özyurt турк емакхонасидан 8 кишидан иборат гуруҳ олиб кетган.
АҚШда ихтиёрий қувғинда юрган Фатҳулла Гуленга яқин оммавий ахборот воситалари, жумладан, Samanyolu TV Корай Вурални махсус хизматлар ўғирлаганини айтмоқда.
Stockholm Center for Freedom ташкилоти хабар беришича, 2017 йилда Туркия прокуратураси Вуралга нисбатан террористик ташкилотга аъзолик бўйича жиноий иш қўзғатган.
Вурал аввалроқ БМТ Қочқинлар бўйича Олий комиссарлигидан хавфсиз мамлакатда бошпана топишда ёрдам сўраган ва жавобни кутаётган эди.
Твиттер ижтимоий тармоғида ўзларини Корай Вуралнинг қизлари деб таништирган Сумейра ва Ясмин Нур уни озод қилишда ёрдам сўрашди.
Тожикистон расмийлари Корай Вуралнинг ўғирлаб кетилгани ҳақидаги хабарларга изоҳ бермаяпти. Кроносо сайти 46 ёшли Корай Вурал 17 сентябрь куни эрталаб Турк Ҳаво Йўллари самолёти билан Душанбедан Истанбулга олиб кетилганини айтмоқда.
Корай Вурал, яқинларига кўра, охирги 28 йил узлуксиз Тожикистонда яшаган. У узоқ йиллар Душанбедаги тожик-турк лицейларидан бирида директорлик қилган. 2016 йилда лицейлар ёпилгач, тадбиркорлик билан шуғулланган. Тожик-турк лицейлари Фатҳуллоҳ Гулен тарафдорлари томонидан молиялаштирилган. Уларнинг барчаси 2016 йилда давлат тасарруфидаги иқтидорли болалар мактабига айлантирилган.
Корай Вурал Тожикистонда ўғирлаб кетилган ва Туркияга бериб юборилган биринчи турк фуқароси эмас. Шу йилнинг июль ойида Душанбедаги «Диалог» илмий-маданий ташкилотининг собиқ раҳбари Эмсал Коч ҳам ўғирлаб кетилиб, Туркияга мажбуран топширилган.
У Туркия ҳукумати томонидан давлат тўнтаришига уринишда айблаган Фатҳуллоҳ Гулен ҳаракати билан ҳамкорлик қилганликда айбланиб ҳибсга олинган. Эмсал Коч Тожикистондан ғойиб бўлганидан кўп ўтмай, уни Туркиянинг Эрзурум вилоятидаги тергов изоляторида кўришган.
Расмий Анқара 2016 йил 15 июлида содир этилган давлат тўнтаришига уриниш ортида АҚШда яшайдиган руҳоний Фатҳуллоҳ Гулен ва унинг “Хизмет” ташкилоти турганини иддао қилиб келади. Туркия расмийлари бу ташкилотни ФЕТО деб атаб, уни террор ташкилоти деб ҳисоблайди. Муваффақиятсизлик билан якунланган тўнтариш уринишидан кейин мазкур ҳаракатнинг минглаб аъзоси қўлга олинган, аммо Гуленнинг ўзи ва унинг тарафдорлари давлат тўнтаришига алоқалари борлигини рад этиб келишади.