Мақомоти Узбекистон мегӯянд, дар натиҷаи истеъмоли доруи "Док-1 Макс" 18 кӯдак дар он кишвар маъюб шуда, шумори кӯдакони фавтида ба 69 расидааст. Ба рӯйхати айбдоршавандаҳо ду нафари дигарро шомил кардаанд. Ба ин тартиб, шумори айбдоршаванда ба 23 расидааст.
Рӯзи 5 январ дар додгоҳе дар шаҳри Тошканд баррасии парвандаи мазкур идома кардааст.
Додгоҳи олии Узбекистон 1 декабри соли 2023 иттилоъ дода буд, ки баъзе аз маводи парванда “барои бозбинии хулосаи айбдоркунӣ, анҷом додани тафтиши иловагӣ ва ба ҳайати гумонбарон шомил кардани шахсони дигар" бозпас фиристода шудаанд.
Баррасии парвандаи доруи "Док-1 Макс", ки дасти кам 69 кӯдак баъди истеъмоли он ҷон бохт, 11 августи соли 2023 шуруъ гашт. Дар курсии айбдорӣ 23 кас, аз ҷумла сардори пешини Оҷонси рушди соҳаи дорусии Узбекистон ва мудири ширкати "Quramax Medikal" нисштаанд.
Дар Узбекистон моҳи декабри соли 2022 ҷамъан 69 кӯдак аз истеъмоли шарбати “Док-1 Макс”, ки аз сӯи ширкати "Marion Biotech" истеҳсол мешуд, ҷон доданд. Баъди ин фурӯши доруи мазкур дар Узбекистон ва чанд кишвари дигари Осиёи Марказӣ манъ шуд.
Хадамоти амнияти Узбекистон дар робита ба марги кӯдакон парвандаи ҷиноӣ боз кард.