Өзбекстандын экономика жана каржы министринин орун басары Илхом Норкулов менен JICA өкүлчүлүгүнүн башчысы Ёшибуми Бито 19-февралда кол койгон келишимге ылайык, Өзбекстан Жапониядан 10 жылдык жеңилдетилген мөөнөт менен 37 миллиард иена (246,2 миллион доллар) өлчөмүндө насыя алат. 30 жылга бериле турган насыянын үстөгү 1,8% түзөт.
"Насыя өлкөдө базар экономикасын өнүктүрүүгө багытталган реформаларды колдоого жумшалат. Мындан тышкары каражаттын бир бөлүгү калктын аялуу катмарына жардам берүү жана социалдык инклюзивдүүлүк программаларына жумшалат", – деп жазылган JICA'нын билдирүүсүндө.
Жапония эл аралык кызматташтык агенттигинин маалыматына караганда, 1993-жылдан 2021-жылга чейин JICA түрдүү программаларды ишке ашыруу үчүн Өзбекстанга жалпысынан 1,5 миллиард доллар каражат берген.