Вазорати умури дохилии Қирғизистон 7 март хабар дод, ки як шаҳрванди 43-солаи ин кишвар бо гумони ташкили аҳроми молӣ дастгир шудааст.
Ба боздошти ӯ шикояти беш аз 100 шаҳрванди Қирғизистон алайҳи молики ширкати "Charge fast" сабаб шудааст. Дертар, баъди дастгир шудани гумонбар беш аз 100 тани дигар низ шикоят кардаанд, ки ӯ онҳоро низ фиреб додааст. Ҷабрдидаҳо мегӯянд, молики ширкат аз 10 ҳазор то 1,5 миллион соми онҳоро азхуд кардааст.
Зидди раҳбарони "Charge fast" бо гумони ташкили аҳроми молӣ парвандаи ҷиноӣ боз карда шудааст.
Пулиси Қирғизистон мегӯяд, соли 2023 бо ҷурми ташкили пирамидаи молӣ 40 шаҳрванди ин кишвар муҷозот шудааст. Шумори ҷабрдидаҳо ба беш аз 350 кас расида, ҳаҷми зарар зиёда аз 68 миллион сомро ташкил медиҳад.