Мекеменин басма сөз кызматы тараткан билдирүүгө ылайык, бул иш-чара "гарнизондун аскердик бөлүктөрүнүн күжүрмөн даярдыгын кезектеги комплекстик текшерүүдөн өткөрүүнүн" алкагында ишке ашырылат.
Билдирүүдө жүрүшкө катыша турган аскердик техникалардын так каттамдары жана убактысы жазылган эмес. Бирок Астананын жака белиндеги айрым трассаларда транспорт кыймылына убактылуу чектөөлөр киргизилиши мүмкүн экени кабарланды.
Коргоо министрлиги жарандарды бул иш-чарага "түшүнүү менен мамиле кылууга", социалдык түйүн колдонуучуларын аскердик техниканын жүрүшү боюнча жалган маалыматтарды таратпоого жана расмий маалымат булактарына гана ишенүүгө чакырды.
Буга чейин Казакстандын бийлиги мындай жүрүштөрдү видеого тартып, аскердик техникалар Орусиянын чектеш аймактарына бара жатканын айткан соцтүйүн колдонуучуларынын билдирүүлөрүн бир канча жолу четке каккан.