Кремль Қозоғистондаги Путинга қарши релокантлар рўйхатини тузиши мумкин, деб ёзади Dala Inside нашри.
“Кремль хорижда бўлиб ўтган Россия президенти сайловлари натижаларидан ҳавотирда. Exit Poll'га кўра, Олмаотада сайловда қатнашган Россия фуқароларининг атиги 9 фоизи Владимир Путинга овоз берган. Унинг асосий рақиби Владислав Даванковга 69 фоиз овоз беришган. Остонада ҳам вазият шундай, у ерда ҳам релокантлар асосан Путинга қаршилик сифатида Даванковга овоз берган ёки бюллетенларни барбод қилган”, — дейилади нашр хабарида.
Нашрнинг Москвадаги ўз манбасига таяниб айтишича, Кремль Россиянинг Қозоғистондаги элчиси Алексей Бородавкин ва Олмаотадаги бош консул Дмитрий Тўраев билан вазият юзасидан маслаҳатлашувлар ўтказмоқда.
“Муҳокама қилинаётган асосий нарса - релокантлар устидан назоратни кучайтириш, Қозоғистонда Путинга қарши ташкилотлар вужудга келишига йўл қўймаслик. ФСБ ва Россотрудничество дипломатларга имкон қадар ёрдам бериши кутилмоқда. Шу муносабат билан Қозоғистонга кўчиб келган россияликларнинг махсус рўйхати тузилиши мумкин. Реестрда ҳар бир релокантнинг сиёсий қарашлари қайд этилади – у амалдаги режимни қўллаб-қувватлаяптими ёки йўқми”, дея аниқлик киритмоқда нашр.
Россияни 2000 йилдан буён бошқариб келаётган Владимир Путин бешинчи муддатга президентликка номзодини қўйиб ғалаба қозонган. Сайловда амалдаги президентдан ташқари яна уч номзод – “Янги одамлар” (“Новые люди”) партиясидан Давлат думасига сайланган Владислав Даванков, Россия Компартиясидан (КПРФ) депутат Николай Харитонов ва Россия либерал-демократик партиясидан (ЛДПР) депутат Леонид Слуцкий иштирок этган.
Сайловнинг учинчи куни “Путинга қарши чошгоҳ” акцияси ўтказилиши эълон қилинган эди. Мухолифат Путин сиёсатидан норози сайловчиларни сайлов участкаларига соат 12 да келишга ва Путиндан бошқа ҳар кимга, асосан Даванковга овоз беришга чақирган.
Шу тариқа улар ўз ҳаммаслаклари билан учрашиб, ёлғиз эмасликларини кўришлари мумкинлиги айтилган. Қозоғистонда бу акция катта муваффақият билан ўтган.
Exit Poll'га кўра, Олмаотада сайловда қатнашган Россия фуқароларининг атиги 9 фоизи Владимир Путинга овоз берган. Унинг асосий рақиби Владислав Даванковга 69 фоиз овоз берилган.